Ajit Doval-i China nung CPC ketdangser den senden amen

New Delhi, Rongchii (April) 13 (Agencies): National Security Advisor Ajit Doval-i Rogonü (Hokolbar) Shanghai, China nung China CPC ketdangser Yang Jiechi den senden amen, ta Indian Embassy ajanga metetdaktsü.
Yaküm Dokalam mangatettep adokba sülen tang agi tanabenbuba Doval aser Yang na tsüngda senden menogo.
Linük ana tsüngda olemtep aiben liyonga aruba sülen Doval aser CPC Politburo züngsem Yang na tsüngda sendenji amen.
Doval aser Yang nay a India-China arrtsü atema teshimtet nübotem lir saka tanü tena senden amendang kechia onüktem jembi’ar osang kecha memetetdaktsü, ta Indian Embassy-isa ashi.
Yang ya Foreign Affairs Commission nunga Director lir aser taoba ita tashi pa ya CPC indang State Councillor liasü.
Foreign Minister, Wang Yi-i Yang indang mapa melenzük aser tang Wang-i State Councillor aser Foreign Minister repsema inyaker.
Yaküm Luchii (December) nung linük ana tsüngda Delhi nung arrtsü indang olemtep 20 buba agidang Yang aden.
Luchii (December) ita sülen India aser China nati China-Pakistan Economic Corridor nung mangatettep aliba, India-i Nuclear Suppliers Group nung adenba aser China-i Jaish-e-Muhammad tanishir Masood Azhar kiralongrar ka ta züngoktsü memulungba onüktem angatetteptsü meranga arur.
Linük anati tongti ketdangsertem tsüngda sensaksem alitsü atema sentongtem atonger aser taküm Aami (June) ita Prime Minister Narendra Modi-i Shanghai Cooperation Organisation (SCO) summit nung adentsü atema tebilemba lir.
Ano, External Affairs Minister Sushma Swaraj aser Defence Minister Nirmala Sitharaman naprongi Rongchii (Apirl) 24 nung Beijing semdangtsü aser iba mapang tenati SCO indang sendentem adenba den tongti ketdangsertem den ajuruteptsü.
Züngsem ti agi akümba SCO nung China, Kazakhstan, Kyrgyzstan, Russia, Tajikistan, Uzbekistan, India aser Pakistan dena lir.
SCO Foreign aser Defence Minister tem Rogchii (April) 24 nü amentsü sentong lir.