Ajit Doval US nung lir, tongti ketdangsertem den ajurutep

Washington, March 25 (Agencies) : Indian National Security Advisor Ajit Doval aser US Secretary of Defence James Mattis na senden ka amenba mapang India aser US na ano maneni defence inyakyimtem lokteper inyaktsü tenangzüktep ka agiogo.
Pentagon nungi otongdar Capt. Jeff Davis-i osang zünga metetdaktsüba mapang, Brihostibarnü Pentagon nung Mattis-i Doval jaoka US aser India nung amalitepa inyaktsübaji international ozüngtem aser inyakyim asoshi kanga tongtibang lir ta senden nung jembiba ashi.
Mattis-i, South Asia tesem nung süngjemdaktsütsü asoshi India-i meranga inyakba asoshi pelar, ta ashi.
Lenir anapronglai linük ana tsüngda defence tsütsü amalitepa inyakba tali tashi itshitsü jembiogo, ta sangdong ka ajanga metetdaktsü.
Mattis aser Doval nati security tebilemtsütem, kiralongrar nokdangtsü aser defence tsütsüb tali longjemtsü asoshi jembi.
Iba senden nung India nungi US Ambassador Navtej Sarna-a dena liasü.
Doval ya US nung anogo pezünü amunger aser iba mapang pai Secretary of Homeland Security General (Retd) John Kelly aser National Security Advisor Lt Gen H.R. McMaster na dena ajurutepa liasü.
McMaster den ajurutepba mapang tena South Asia tensa asadanga jembi.