Ajit Wadekar nem akhum agüja Mumbai nung remogo

Mumbai, Luroi/August 17 (Agencies): Taoba mapang India nunger cricket captain, Ajit Wadekar ya Mumbai nung aliba Shivaji Park crematorium nung tanü state-i akhum agüja remogo. Wadekar ya Luroi/August 15 nü asü.
Wadekar, shibai India anir 1971 küm West Indies aser England nung mezüng takok angu, pa mapang talangka shiranga arur South Mumbai hospital nung iba lima nungi bila.
Wadekar ya India nunger cricket nung manager, coach aser selector mapatema inyaka liasü. Pa ya batsman ka liasü aser One-Day International nung India asoshi mezüngbuba captain liasü.
Pa meimertemi pa nem akhum agütsütsü asoshi Wadekar temang ya tanep Worli nung par kidang ayu.
Cricket asayar tejen, Sachin Tendulkar, Vinod Kambli, Sameer Dighe, taoba mapang India nunger hockey captain M M Somaiya, Mumbai Cricket Association nung taoba mapang inyaker aser tang teinyakdak alirtemi pa atema sarasademtsü aser asükhu lemsatepa liasü.
Board of Control for Cricket in India tenüng nung BCCI General Manager (Cricket Operations), Saba Karim-ia akhum agüja liasü.
Wadekar temang ya open truck ka nung inoker Dadar, Central Mumbai nung aliba Shivaji Park Gymkhana (SPG)-i bener ao. Gymkhana nung India nunger taoba mapang cricket asayar Sandeep Patil, Nilesh Kulkarni nungertemi akhum agütsü.