Ajmal-i Assam sorkar indang draft population policy anemer

Guwahati, April 22 (Agencies): Assam sorkari ‘draft population policy’ nung tanur ana tema alir nem mapa magütsütsü tebilemba anema Supreme Court nung ken o benoktsü bilemer ta All India United Democratic Front (AIUDF) tanishir, Badruddin Ajmal-i ashi.
“Iba draft policy ya temeten anema lir. Sorkari nütsüng aika aliba tesemtem nung education aser health facility tajungba agütsütsü atema temulung agütsütsüla. Population policy ya tatem küma lemtetra, onoki Supreme Court nung iba anema ken o benoktsü” ta Ajmal-i tanü ashi.
Ajmal-isa ashiba agi, Assam sorkar indang draft population policy ji state nung Muslim nunger aser jenjang tajemba tia nung aliba teloktem anema lir.
Assam sorkari yangluba draft policy nung tanur ana dak tema aliba candidate nem sorkar mapa magütsütsü shia lir. Iba policy nungsa panchayat aser tanga local bodies elections nung tanur ana dak tema alir meshimoktsü atema onük benoka lir.
Assam health minister Himanta Biswa Sarma-i ashiba agi, draft state population policy nung state nütsüng yongsük azüoktsü atema onük aika benoka lir.
Tesüiba küm 10 tsüngda Assam nung nütsüng crore 1 shi renlokba atema iba policy ya benok ta Sarma-isa shisem.
2011 census nung Assam nütsüng yongsükji crore 3.12 liasü.
Assam sorkari yangluba draft policy nung public tebilembatem meshitsü atema public domain nung metetdaktsüogo aser iba sülen taküm August ita assembly nung benoktsü.