AJYCP-i Citizenship Bill agientsü aser ILP den dual citizenship tenzüktsü akhanger

Guwahati, January 21 (Agencies): Assam nung lanur telok tongtipang ka- Assam Jatiyatabadi Yuba Chatra Parishad (AJYCP)-i Citizenship (Amendment) Bill 2016 anema aser ILP den dual citizenship inyakyim tenzüktsü takhangba agüja lungkak aittsü.
January 26 nü parnoki yimtsüng tia nung aliba tesemtem nung Citizenship Bill anemba den ILP aser dual citizenship indang osang prokshitsü ta AJYCP general secretary, Palash Changmai-i ashi.
Parnokisa January 30 nü state ajungalen Bill agienang ta takhangba agüja lungkak aitba sentongtem agitsü, ta paisa ashi.
Maneni, February 7 nü AJYCP-i tesem balala nung ‘rail blockade’ alitsü.
“AJYCP-i taoba küm 40 tashi Assam nung Inner Line Permit (ILP) aser dual citizenship maparen tenzüktsü atema takhangba agüja arur. Tanü tensa reprangdangra, onoki akhangba onük ana ya kanga tongtipang lir” ta Changmai-isa metetdaktsü.
AJYCP-i Asom Gana Parishad (AGP) dang Assam Assembly nung taruba budget session nung opposition political party tem longjemer Citizenship Bill anema bangzüng ka renemtsü atema mapa inyaktsü ayongzük.
Chief Minister Sarbananda Sonowal-i Citizenship (Amendment) Bill posema jembiba atema AJYCP-i aitsü.
“Sarbananda Sonowal-i tashi kanga aginüba ajanga pai New Delhi nung sorkar tsüngdang apudaker. Ibaji pai Citizenship Bill atema jembiba ajanga kuli angur” ta Changmai-isa ashi.
Assam nung BJP-i tamangba yimsü aser oshi nung ajemdaker politics mapa meinyaktsü atema AJYCP-isa kümdangtsü metetdaktsü.