AK Antony-i Cong Tir menden magizük

New Delhi, June 14 (Agencies): Tang tashi Congress party mesüngjemteti party nung lenir tain, A.K. Antony-ia party Tir inyaktsü magizük, ta osang ka ajanga metetdaktsü.
Taküm Lok Sabha election nung Congress-i tamakok mejungi anguba sülen party Tir, Rahul Gandhi-i tekong meranga Tir menden nungi sodi meshir.
Party osang ka ajanga ashiba agi, taoba mapang Union Defence Minister aser Gandhi kibong den akhang tembar, Anthony-i pa temang manemi dang aliba kuli nung ajemdaker Tir inyaktsü magizük.
Iba dak alia party General Secretary, K.C. Venugopal nem Working President menden agütsü saka pai magizük, ta osang angazüker.
Gandhi kibong nungi masüba lenir ka Congress Tir shimtsü atema party nung lenir tain ana- Ahmed Patel aser Ghulam Nabi Azad nem lemzüktsüba sülen tenati Antony dang Tir inyaktsü asüngdang. Ajisüaka Antony-i Patel aser Azad na dang, pai Gandhi kibong kanga akümtsübur saka iba menden magizüktsü ta shiogo.
Congress Working Committee (CWC) senden nung Rahul Gandhi-i Tir menden nungi sodi meshi saka CWC-i magizük, ajisüaka tang tashi Rahul-i tekong meranga sodi meshir.
Joko Congress lenirtemi party Tir inyaktsü atema North India nungi lenir ka bushidar, ta osang angazüker.
Iba dak alia lenirtemi Working President menden atemaa nübo tasen ka bushirdar.
Congress-i Tir ka alitsü aser Working Presidents aika shimtsü tebilemba lir.