Ak shi nokdangba tajungba

Tangalen nungi Nagaland-i bener aruba ango nokdangba sülen ano akshi nokdang nunga koma süla ta taoba hopta tepiyong asenoki bilemdanga aruogo. Asenok tarutsü rongsen jenjang ajungtsü asoshi tanü iba amai bilemdanga telemtetba agitsüla. Nagaland nung alir Naga nungertem sen angudak ajak agi government ita sen anguba ya dang lir. Tetezü Nagaland nung rongsen aruba aser endokba ajakji ita sen dang, anungji ita sen angu nü shishilembadak kanga longsuteptsü aser ita sen mangunü shishilembadak azüngazünga akümtsü. Iba ama ita sen dak dang nendaker aliba lima aser nübortemji alima rongsen tsütsülen kanga sensaker aser tarendaktsüka lir. Atangji, teti senmang küma agitsüsa mapa tuluka meinyaktetyonga, ita sen achirtem asoshi ita sen jagi kibongbo mesüa otetter, anungji kangabo shisamebulur. Ano külen, pei ita sen yari kibong moutetba ajanga timtem aser takoksa tulu ajuruba Naga nungertema jenti lir. Asenok asoshi timtem kaji asenoki asenok achitsü aonsutsü dena mezüsentetter, anungji metsü mersü nungi shir süngolemba tashi bendanglen nungi bener aruba alia achir. Atangji, asen ket nung asen ita sen anguba sen lir, anungji shishilembadak anguba asen nüngdaktem ajak melamelaa alia achir. Item melamelaa alia achiba nung asenoki sen teimba endokba chiyongtsütemji tzümalen nungi bener aruba shi aser ango asütsü. Asenok tia ajung tang atema angobo nokdanga lir saka akshibo maneni bener arudagi. Tang mapang tatsüka tsümalen nungi ango bener marudaktsüi nokdangba nunga Naga nunger kibong aika tashidak nungi kümzükba den senotsüa aika kümzükdagi. Iba amaji asen limai bener aruba nashi aser nabong shi ya khen toktsür asenoki akshi ya nokdangtet asübo senotsü dang masü saka asenok tashidak aika nungi asenok kümzükla. Alima nung nisungtemi achiba shi tendangertemi ashiba agi, shi ajak rongnung tamajungtibaji akshi ya lir, kechiyong ak yagibo tangbuba ajak achir. Ano, India nung balaka ak metsüba ya süngolemba aser chiyongtsü temerük agi metsür masü saka tzüchi aser moapu nung mashimashi chiremdakja metsür. Ano tesempatsü kaji, India nung kibong aika nung metsümeshidak yanglua maka, anungji nisung ajak anepdang yakta moapu bushia oagi metsümeshitsü aser item janatemji aktemi arua achitsü. Iba denji külemi ano aktemji yakta indaktsütsü atema mozü chidaktsür. Iba amaji metsüba aktem pudena bener arua asenok dang ayoker aser asenok dang akshiji kanga ajung nungji raktepa alia achir. Tanü Naga nungertem tashidak tulu tapu balala agi shirangba ya mozü aketba shi aser ango tali achiba agi adoker ta putetter. Aji oda, asenoki jungjunga bilemdangra, taoba küm paikato tzümalen nungi bener aruba shi aser ango aliba nung sen endokba to temang asoshi chiyongtsü tajung alir masü saka tashidak alirba liasü ta angatetter. Chakhesang nungerbo joko küm aika par limai tangalen nungi ak bener marudaktsür, anungji parnok rongnung ak metsür aika adoka lir. Parnok amaji asenokia inyaktet. Government-isa menokdangyonga, Chakhesang nunger amaji asenok kin aser lokti telongjemi tanglen nungi bener aruba akshi nokdangtsü asoshi telemtetba agitsüla aser tang akshi alepertemi anir ak metsü tenzüktsüla. Iba jagi asenok rongsen züintsü aser shi tajung chia anema alitsü. Asenoki angatettsüba kaji sen jenjang tera temela agi tashidak aketba shi alia achitsü agibo, jenjang tera tasakba agi asüyonga tashidak maketba shi tajung alia achiba tajungba. Joko, asenoka government ita sen tera anguba agi tebok sünga aliba kisüng nung temulung sür melili, saka asen nüngdakba tashibo, chiyongtsüa sang, osettsüseta sang, asenoki asenoksasa züsentettsüla. Iba temelenshi mapang kaji tenzüktsü atema tang ango nokdangba ama akshi dena marudaktsüi nokdangtsüla. Iba amaji tangalen nungi marudaktsüi nokdang nungang asenoki asenoksasa asenok nüngdakji reprangteta meranga inyaktsü.