Akademi-i ola adokba asoshi pelar: Kaket ken o zülurtem

Dhanachuli (Uttarakhand), October 24 (Agencies): Kaketzülur, MM Kalburgi tepsetba asoshi Sahitya Akademi-i aitsüba aser mera karbo agitsü ta nangzükba sülen anogo ka lir tanü kaketzülur aikati, iba onük nung mapang talangka lir Academi-i ola adokba atema pelar, ta shiogo.
“Akademi-i sangdong tuluka agütsüogo. Kaketzülurtem ka ama onoki nüburtemi sadoka jembitettsü asoshi inyaktsü,” ta kaketzülur Jerry Pinto-i ashi.
Academi-i ola madokba atema kaketzülurtemi award meyipa agütsüba asoshi aitsüba dak sentakba nung Pinto-i, “Tesüiba küm ishika atalokbaji, temzüng ozüng alema inyakba züiner. Iba ya tetenzükba onük ka lir. Tangbo nisung mashi kati ajak inyaktsü akok. Kaketzülurtemi iba asoshiji inyaker. Ola madoki talangka aliba nungi onoki tangbo adokogo, iba asoshiji pelatsüla,” ta ashi.
“Tatalokba ajakji yimtenren ajanga lir ta aikati bilemer. Award agizükba nungi magizükba aser meyiptsüba ajakji yimtenren ajanga. Yimtenren ajanga ajungshia award meyiptsüba atema kechiba kaketzülurtem dang aitsütsü. Iba ya shimteta aitsüba ka lir,” ta pai ashi.
Kaketzülur Anuja Chauhan-ia, ola madoki aliba nungi Akademi-i ola adokba atema pelar, ta shiogo. “Akademi-i ola madoki aliba ola adokba atema pelar, award meyiptsüba ya temaitsü aketba mera ka lir. Iba ya yimtenren dak sentaktepa mali ama nibo bilemer, kechiyong kaketzülur Nayantara Sahgal nungeribo mapang shia pei tebilemba rakpoka jembia aruogo,” ta Chauhan-i ashi.

You must be logged in to post a comment Login