Akali Dal lennir kati tepsettsü tuyu ta Gurjant Singh-i aitsür

Chandigarh, December 20 (Agencies) : Punjab kübok Abohar tesem nung teka aser tetsüng alangdoktsüsang Gurjant Singh-i ashiba agi, Akali Dal lennir Shiv Lal Doda’er kinünger kati iba mapa inyaktsü tetuyuba agütsü.
December 11, 2015 nü Gurjant aser par medemer Bheem Tank na dak teka aiba farmhouse ji Doda indang lir.
Doda ya yi shishilembar ka lir aser pa police-i ano mapu lir. Ajisüaka par kinünger Amit Doda-i tanü pa sasa police ket nung bendanga agütsüogo.
Iba ken o dak sendakba nung police-i nisung 13 puogo.
Gurjant’er medemsangji Dalit nunger Bheem Tank liasü saka nisungtemi pa teka aser tetsüng alangdoktsüba sülen mozükidangi anir aodang len tom nung pa asü.
Bheem indang mang rangsa reprangdang, temang nung zübo 20 angu aser itemji kanga mejungi yirutsüba zübotem liasü.
“Parnok nisung 11 shi kati teyirutsütsü osettem bena liasü. Parnoki küna farmhouse telung nung shibang. Onoki parnok tanishir Amit den tesentaktep raksaba atema parnoki küna dang tansütsü ka sayutsü ta ashi” ta Gurjant-i osangbener dang ashi.
“Nisung anati küna indang tetsüng aser teben nung ammeta lia tangartemi lepdoktsü. Parnoki onok tepsettsü nükjidong liasü” ta paisa shisem.
Iba tatalokba atema Opposition Congress-i Punjab Police aitsür. Sorkari tebang aitba ajanga police-i Akali lennir aser par kinünger anema mapa meinyaker ta Congress-i aitsür.
Tan hopta Rajya Sabha nung iba onük benok aser iba mapang Opposition Lennir Ghulam Nabi Azad-i Punjab sorkar anenjang ta takhangba agütsü.
Punjab nung tang BJP aser SAD teloktep sorkar lir aser Parliament nung opposition züngsemtemi sorkar anendakjang ta takhangba agüja lungkak aitba ajanga senden junga magiteti liasü.