Akhi aser tanü putu na tsüngda Hindi ya tesentaktep ka lir: Pranab

New Delhi, September 14 (Agencies): Hombar nü linük Tir Pranab Mukherjee-i, akhi mapang linük terenlok aser tanü putu nung terenlok na tsüngda Hindi ya tesentaktep ka lir, ta ashiba den külemi kobi melii United Nations official language nung Hindi oshi ya züngoktsü imlar, ta ashi.

‘Hindi Divas’ anogomung nung sentong ka nung jembidang Pranab-i, nüjiso anguba sülen Hindi ajanga alizüng aika tongtetogo aser iba oshi ya India nunger tangatetba aser sobaliba nung gari ama lir, ta ashi.

Hindi oshi ajungkettsüba nung shilem kanga junga agir nija aser sorkar tentettem nem sempet lemshia agütsüba sülen jembidang Tir-i, “Iba oshi ya asen sobaliba shisaliok, akhi mapang terenlok aser tanü putu nung terenlok tsüngda tesentaktep ka lir. Linük terenlok nung yimtsüng nütsüng densema ajaki shilem agitettsüsa science aser technology nung Hindi amshitsü asenoki merangtsüla,” ta ashi.

Mukherjee-isa, alima rongsenkettsüng nung temelenshi tulu aliba mapang ka nung Hindi oshi kanga bulua jembir, kechiyong bendanglen alir India nunger million aikati Hindi ya tesentaktep oshi ka ama jembir aser iba ya ajanga International level nunga Hindi ya nüngtugu akümer, ta ashi.

“Asenok ajak senteper merangba ajanga kobi melii United Nations official language rongnung

Hindi oshi-a densemtsü ni amanger,” ta paisa ashi.