Akhi tsüngkümmongpu masü !

Taküm küm tsüngküm mapang aruba yabo balaka metetmeteta mekongzüka oa asüker. Atangji, akhidanga tang ama tsüngküm mapang nunga kenü ananübo tsünglu arur aser temekongba akümer, saka taküm küm amaibo hopta dak tali tsünglu arubabo mebilemtetter. Joko, hopta süia tsüngsang majunger asünungji, Nagaland tesem aika nung rüjep alaba agi mapaa meinyaktet kümogo. Iba jagi maparen aika nung asenok takoksa angutsü. Tali mekongba agi arem aser kiset shirurutem dang masü saka ayong nung ango aser taküm sangnutem ajak temekong metizüktet süadoktsü aser akhidang adokba aonsutsütema junga memeyitsü. Tzübo nung aser pipe nung aruba tzü ajak rülong kümadoktsü, anungji tzü tajemtsüa saksaka angutsü. Atangji, tang ama alijak sünga rü alaba mapang ya asenoki memeteti sensaker aika asükba agi amuia moutet timtema alitsü aser meshimetsürtem aika yimdong nung süadoktsü. Item ama timtem aser takoksatem nungi tenzüker, kodang tali mekongdir mesüra tali tsüka kümdir, shisabolutsü tulutibaji aluyimbaren nung timtem tulu ajurutsü. Akhi mapang nungi nisungtemi aluyima aruba ya tsüngkümmongputem takzür, alu achiba, alu arongba aser alu atenba mapangtem lateta inyaka arur. Ajisüaka, tanü putu tsüngkümmongpu yimya ya ajungbena meimlaika melenshipet melenshir. Aji oda, tang ama takong mapang asütsüba mongpu nung tsünglu arur aser tsüngluruwa mapang tsünglu marur ta asüba agi aluyimertema kodang koba alu mapa inyaktsüar meshitetka küma odagi. Asenoki metetmeteta taoba küm ishika jakdang nungi asen lima tsüka akümba ajangshir. Aji oda, Kohima aser Mokokchung ama temekong tesem nung akhidangbo lemluwa mapang nunga fan mamshi saka tangbo ajak kidang fan amshir aser ano takokeribo air condition dena enoker. Iba denji ano tatsük asüba agi kibong shia refrigerator akatsübaji tenüngdaktsü oset kümogo. Item amaji kodang bilemdangdir, tsüngkümmongpu melenshiba ajanga asenok libalirua melenshitsüsa akümer aser akhi mapang dang nungi taküm aser kibong lia aotsüba jenjang tasakba akümer. Aji oda, tanü putu nung alima ajunga atema shisabolutsü tulutibaji akhi tsüngkümmongpu memesük melenshiba ya lir. Joko, tang ama temekong mapang ya kangasa temekong aser tatsükba mapang kodang arudir, ano akhidang dang nungia kanga agia tatsükba akümer ta akümba ajanga aluyimertem aluyimba nung takoksa angur. Atangji, kanga asükyonga talem süoshi aser mi agi akoktsü aser kanga atsükyonga kilembok lira yangji kümzüktettsü, saka aluyimertemi alu nungi chiyongtsü mezüsentettsüsa tsüngkümmongpu meshitaki kümra, asenok shinga tebok tazüng serbo taküm melitettsü. Tebilemtsüji aji lir. Tanü asenok ajaki takar kümner saka chiyongtsü züsentetba nung masü saka senotsü bendenba nungang temulung agütsür. Iba jagi alima nung takaba süngdong ajak lensüka sen agi melener aser ali telong agi tema küma mijang tua sen lenmang bushir. Alima tsüngkümmopong melenshiba agi asenok dangi timtem lendong aruba ya asenoki mereprangtetra, memenui asenok ya ki sünga sen nemdena yur aya aser tzüraba agi asütsü. Asenoki anir jajaba gari nungi tatsük adokba kisüng agi mopong menendaktsüba aser asenoki amshiba plastic janatem agi kilentsü aser ayong sünga menendaktsüba kisüng agi alima tsüngkümmongpu ya asenoki memeteti tuluka melenshidaktsür. Aji oda, tang ama tali mekongba agi talem süoshi bushia asemba aser tali atsükba agi mopong temekong agiba ajanga anisüngzük anguba yagi asenok aliba lima aser asenok taküm kümzükogo ta mebilemli. Iba ama alima tsüngkümmopong melenshiba ajanga timtem lendong ataloktsüba nungi kümzüktsü asoshi asenok senso shia teinyaktsü shilem lir. Ibaji meteta koba mapa agi alima nung tzü aser mopong menendaktsür, koba mapa agi arem maka kümdaktsür aser koba mapa agi ayong menendaktsür, itemji akok tashi meinyakli. Item ama sentongtem nungbo asenok ajaki ochishia inyaktsü merangdi. Aji oda, alima tsüngkümmongpu melenshiba ama aluyimba metsü tsüngküm aser tejangtetsü melenshia alu yimtettsüsa aluyimertemi shisadangtsüla aser aluyimba nung mongin nisungtem anioka, aluyimba maparen putu yimya aser tsüngkümmongpu den putepa renlokdaktsütsüsa government nung sentong yanglurtemia shisabolua khuret bena inyaktsübaji tongtibang mapatem rongnung tongtibangtiba mapa asütsü.