Akhil Gogoi apuba ajanga BJP puri tashiyim amshiba sayur: Tarun Gogoi

Guwahati, September 26 (Agencies): Mongolbarnü taoba Assam Chief Minister Tarun Gogoi-i ashiba agi, Krishak Mukti Sangram Samiti (KMSS) lenir Akhil Gogoi apuba ajanga state nung yimsü tesüdak Bharatiya Janata Party (BJP) puri tashiyim agi yimsü asüba yimya tali jangjaa sayuogo.
“Akhil Gogoi apuba ya kecha masü saka sorkari tashiyim amshiba sayurba dang lir. Democracy nung nübur ajaki sorkar aitsütettsü. Gogoi-i sorkar kanga kümdanga asadanger aser ni CM inyakba mapang nunga pai kasa yimyaji benshia aruogo. Ajisüaka onoki National Security Act (NSA) senzüka metoktsü aser pa anti- national ka ama mebenshi,” ta taoba CM-i osangbenertem dang ashi.
Paisa ashiba agi, tang yimsü tesüdak sorkari parnok aitsürtem ajak sota yuner. “Sorkar aitsürtem ajak dang anti-national ta ajar aser iba ya India ama democratic linük ka asoshi lendong lir. Iba ozüng alema sorkari tetuyuba agütsüba ya aitsüadokogo aser sorkari iba amala yimya benshiba ya onoki melenshidaktsüner,” ta Gogoi-i ashi.
Hombarnü National Security Act (NSA) kübok Akhil Gogoi apu. Pa anema Assam nung ken o benoka alibatem dak ajemdaker iba act kübok pa apu.
Ken o tem rongnung 2016 küm ‘Kaziranga eviction’ densema lir. Iba mapang nung pai ozüng alema ali atsünga arua alirtem ajungshiba atema pua liasü koba ajanga police firing mapang nung nisung ana tashi khaset.
KMSS lenir ya Indian Penal Code (IPC) Sections 120 B, 121, 124 (A), 109, 153, 153 (A) aser 34 kübok aija apu. Pai Moran nung lokti senden ka nung o jembidang sorkar anema AK-47 prangbong amer apusotsü asoshi ajungshia liasü, aser iba dak ajemdaker pa apu.