Akhil Gogoi chioktsü HC-i tetuyuba agütsü

New Delhi, December 21 (Agencies): National Security Act (NSA) kübok aija Assam sorkari Akhil Gogoi tepokdak yua aliba ken o Guwahati high court-i Brehostibarnü tim masü ta aitsüogo, aser iba ajanga aluyimba lokti lenir ya yakta chioktsü akok ta pa pusemertem timla nung lir.
Gogoi ya Krishak Mukti Sangram Samiti (KMSS) lenir lir aser pa ya BJP-i aniba state sorkar anemer ka lir. Pa September 13 nü nungi tang tashi Dibrugarh jail nung yua lir. Pai linük anema lokti senden ka nung jembiba atema Indian Penal Code Section 124 (A) kübok aija apu, aser iba sülen September 25 nü NSA kübok aija tanaben pushi.
Dibrugarh anasa Moran jila nung Narendra Modi’er sorkari Bangladesh nungi arua alir hindu nungertem nem lisopur jenjang agütsütsü asoshi telemtetba agiba anem rally ka akaba mapang nung Gogoi-i sentepa aliba lokti dang pei tasoli aser pei temeden kümzüka ayutsü asoshi hadir balala bener sorkar anema nokdaktsü asoshi ajungshiba atema aija apu.
Brehostibarnü high court ajanga obendang agütsüba sülen osangbenertem den jembidang Gogoi okatsür Santanu Borthakur-i ashiba agi, advocate Nilay Dutta-i Gogoi tenüng nung onük asem tashi nung nokdaktsü: “Mezüngbuba onükji constitution Article 22 (5) kübok pa indang fundamental rights agintsüba liasü, kechiyong pa dang shingaia NSA detaining authority, Nowgong district judge aser central sorkar nem pai representation ka agütsütettsü ta shingaia mashi. Tanabuba nung NSA kübok pai aija apuba kuli kakettem timba ka onok ket metongtsü, aser tasembuba nung iba ken o ya sensopur ka fundamental rights aser liberty dak sendakba ken o ka asü nung state sorkari NSA kübok maparen tinyaktsü aliba tem tekaratiba nung inyaktsü asoshi nüngdaka liasü.”
“Ajisüaka Gogoi-i Assam sorkar nem representation ka agütsüba aser state sorkari Centre nem agütsüba kecha kuli makai hopta ka agi menoadok. HC-i mezüngbuba aser tasembuba onük Article 22 (5) kübok asadanger pa nem nüjiso agütsü,”
KMSS pusemertem aika Brehostibarnü Dibrugarh jail nung parnok agizüktsü asoshi sentep, saka Gogoi ya tangsa tangbo mechioktsü amai bilemer.