Akhil-i ochimashi keno dak sendakba nung BJP MLA ka aitsü

Guwahati, Tsüklai 1 (Agencies): Krishak Mukti Sangram Samiti (KMSS) puri Rasemnü Assam nung BJP-i aniba sorkar aija ashiba agi, sorkari state nung nagmati belenshiba nung ochimashi keno sendaka aliba atema tapet jenjang magir, kechiyong Upper Assam, Margherita tesem nungi BJP MLA Bhaskar Sharma ochi mashi inyakyim nung densema lir.
“Onoki RTI application agütsüba nung telangzüba agüja, Coal India Ltd-i ashiba agi, anogo ka nung nagmati abenba gari ti nungi ter tashi dang sensüdaktsür, saka onoki Margherita nung nagmati atuba tesem nungi anogoshia gari 150 nungi 200 tashi-i nagmati belenba nguogo. Tata gari ka nung nagmati tone 10 dang abentsü asoshi melar saka item gari temi tone 20 nungi 25 tashi abener. Nagmati belenba nung anogoshia ochi meshi sen crore 1 nungi 3 tashi alang shishilembadar, aser item ajunga bendenra küm nung ochi meshi sen crore 2,000 shi alang nagmati shishilembadar. Iba shishilembaba ajunga ya police teyari nung Sharma-i anir inyaker,’ ta KMSS adviser Akhil Gogoi-i osangbenertem dang ashi.
Iba taitsüba atema telangzüba agüja Sharma-i ashiba agi, pa nagmati shishilembaba nung densema mali. “Coal India Ltd-i temelaba agütsüba sülen mapa inyakertem belentsüba atema contract kar ni agizükogo. Akhil Gogoi-i ni aitsüba ya ni reject asür. Ozü sorkar kümteter küm anashi dang lir aser Margherita nung nagmati shishilembaba ya tang tasen masü. Licences aika taoba sorkari dena agütsüogo,” ta pai ashi.
CID puri bushisüngdangba nung ngutetba osang koba home department nem taoba küm Aenjeti (January)17 nung agüja liasü iba osang ya ateshia Akhil-i ashiba iba report nung police, local politician ka aser Coal India Ltd. nung ketdangsertem ka densema aliba metetdaktsüogo.
“Iba report nung nagmati belentsüba atema tata gari 10 nungi 15 dang amshitsü asoshi temelaba agüja lir, saka gari 70 nungi 75 tashi amshir. Sarbananda Sonowal-i aniba sorkari nagmati tua belenshiba maparen nung ochimashi aliba atema kecha minyaker, kechiyong par party nungi MLA ka iba inyakyim nung densema lir. Onoki Sonowal dang pai cabinet senden mezüngbuba nung nangzükba ama ghonda 48 tsüngda nung iba ochimashi maparen anema inyaktsü asoshi akhanger,” ta Akhil-i ashi.