Akhilesh küna tsüngda mangatettep mali: Mulayam

New Delhi, January 09 (Agencies): Hombarnü Samajwadi Party (SP) lenir, Mulayam Singh Yadav-i party maitsü, cycle temeten meshitsü atema Election Commission office semdangba sülen pai, “Ozü jabaso (Uttar Pradesh chief minister, Akhilesh) küna tsüngda mangatettep mali,” ta metetdaktsü.
Par kinünger Ram Gopal aitsüba olen ka nung Mulayam-i, nisung kati Akhilesh ajungshir aser party tsüngda timtem adokdaktsür, ta ashi.
“Kari ozü jabaso (Akhilesh) ajungshir. Yasüng aser tanep naprong iba onük atema ni pa den jembiogo. Ozü jabaso küna tsüngda mangatettep mali,” ta Mulayam-i ashi.
“Party telung nung mangatettep tila ka dang lir. Iba ya nisung ka tai ajanga lir. Ajisüaka onoki ibaji tekaratiba nung bentettsü,” ta paisa ashi.
Tanep Mulayam-i Chief Election Commissioner, Nasim Zaidi ajurua minute 40 shi senden amen. Pa den pa adianu, Shivpal Yadav aser külem inyaker, Amar Singh nata liasü.
Tanep senden amendang Mulayam-i Election commission dang, January 1 nü party national convention alidang party tongti atema Akhilesh shimbaji temzüng dak mapet aser party temaitsü, ‘cycle’ ji parnok telok meyong lir ta shiogo, ta osang angazüker.