Akhilesh Yadav-i azüngtettsüba bungalow bushisüngdangtsü

Lucknow, Aami (June) 11 (Agencies): Taoba Uttar Pradesh CM Akhilesh Yadav-i toktsüba sorkar bungalow ka atema BJP aser SP tsüngda o atsütepa aruba sülen state sorkari iba kiojen atema bushisüngdang ka asütsü tetuyuba agütsüogo.
“Azüngtettsüba bungalow tem indang official record tem medemdangtsü. Department ket nung bungalow tem indang osang ajak lir. Asaa kiojen raksatsüba putetra, notice agütsütsü aser temenok meshitsü” ta State Estate Officer, Yogesh Shukla-i ashi.
Taoba Uttar Pradesh chief minister temi Supreme Court tetuyuba sülen anidaka azüngtettsüba bungalow tem indang mesayur ta Samajwadi Party-i sorkar dang asüngdanger.
“CM’er staff-i ochimashi indang ken o tem lir saka sorkari iba onük nembangtsü atema ozü ki indang onük jembir. Parnoki enoktsüba tap ni enoktsütsü saka parnokia onoki enoktsüba switches aser light boards ajak meyipa agütsütsüla” ta Akhilesh-i ashi.
Taoba Chief Minister tem- Kalyan Singh, Mayawati aser Rajnath Singh nungeri azüngtettsüba kiojentem nunga reprangtsü ta sorkar ketdangsertemi ashi.
Taoba CM Narayan Dutt Tiwari tang temang kanga mejungi Delhi hospital ka nung anepaludar aser pai official residence metoktsü lir. Pa kinungtsüi küm ka meshilok saka Estate Department-i iba temepishibaji magizük. Parnoki temeim sayua June 3 tashi mapang apuloktsüba süoigo.
Estate Department ketdangsertemi taoba Honibarnü Akhilesh Yadav nem lemzüktsüba 4, Vikramditya Marg residence semdang aser idangji sen crore 42 endoka yangluba ki kanga mejungi aliba angu.
Kiojen kanga mejungi raksatsübaji tejashitsüka lir aser iba ya Supreme Court mezüngmeshiba lir ta Transport Minister Swatantra Dev Singh-i ashi.
Ano külen, BJP otongdar Rakesh Tripathi-i iba ajanga Akhilesh Yadav indang tangatetba aser sobaliba jungkai adoka sayur ta ashi.
Ajisüaka, Samajwadi Party otongdar Rajendra Chowdhary-i item onük magizükba metetdaktsü aser parnok party tanishisang Akhilesh tenüng menüktsütsü atema tasa atonga inyaker ta meyiper tai tongloktsü.