Akhlaq’er kidang aliba shiji nashi masü napong shi liasü

Dadri, October 09 (Agencies): Taoba hopta Dadri nung nisung ka tenüng agi Mohammad Akhlaq-i nashi shi achi ta tai tonglokja loktii pa tepset, ajisüaka par kidang aliba shiji nashi shi masü saka napong shi liasü, ta jangjaogo.

Akhlaq’er kidang aliba shiji forensic tetendangba atema yoka liasü, aser iba shiji napong shi lir ta jangjaogo. Iba osang ajanga Akhlaq’er kibongi par kidang napong shi liasü jembiba kuli metentsür.

Times of India osang ajanga ashiba agi, September 28 nü Bisada nung Akhlaq’er kidang aliba shiji mezüng tetendangba atema veterinary doctor ka dangi yoka liasü aser iba tetendangba ajanga ibaji napong shi lir ta putet, ajisüaka osang tejangja atema police-i iba shiji Mathura nung aliba laboratory-i yok, aser idakji-a shiji nashi shimasü saka napong shi lir ta osang agütsüogo.

Iba osang tasen ya ajanga Akhlaq ji yazü olulu nung ajemdaker tepset ta jungkai adokogo, iba den külemi iba yimtsüng nung küm 50 dak tema yimjung nung alir senso ka tepsettsüsa akümbaji kechi kuli ajanga ta tasüngdangba tasen ka aruogo.

Dadri nung atalokba ajanga linük nüburtem kanga aoksatepogo.

Iba tatalokba dak sentakba nung yashi Bihar nung election nüboyim sentong ka nung jembidang Ato kilonser Narendra Modi-i, “Nübur ajak yimjung nung alitsü nüngdak. Hindu aser Muslim nungeri, parnok tsüngda rarateptsü asü parnok lungjemer sensak tia anema raratsü’ar ibaji lemtettsüla,” ta ashi.