Akhoya Fellowship Kohima jubilee mungogo

(Abelen) Akhoya Baptist Arogo nung sannuker T.Lanu-i Akhoya Fellowship Kohima jubilee mong nung Tsüngrem o jembiba angur. (Achichi)Akhoya Fellowship Kohima jubilee mong  sentong lanurtemi lapoktsüba mapang agiba noksa ka yangi angur.

Kohima, Mongputeni/Oct. 08 (TYO): Kohima nung Akhoya Fellowship tenzüker küm 25 ajungba taribi jubilee mong sentong ka yangi Kohima Ao Baptist Arogo kübok Lirie Fellowship tenla kidang kanga junga agiogo. Iba jubilee mong omen ‘Mechioktetba Temeim” nung amendaker jembidang, akhi tsüraburtem mapang nungi tanü tashi Tsüngremi asenok mechioki meima aruba taochi mapa aser temoatsütem bilemtettsüla aser asenokia Tsüngrem dang meimba temeimji mechioki akang-akanga amangtsüla, ta Akhoya Baptist Arogo nung sannüker T. Lanui ayongzüka jembi.
Iba sentong nung jubilee nüngo kaket Wt. Anenla T Sato IAS-i sayatsü aser Kohima Ao Baptist Arogo nung sannuker Wb. Tiatoshi-i tepela o jembi.
Iba jubilee sentong nungsa Ungma Senso Fellowship Kohima, Dimapur Akhoya Fellowship aser K.Temjen Jamir nungertemi tajungshi aser tepela o jembia liasü.
Iba jubilee sentong lapoka lanurtemi saya ka kanga junga ai aser Jubilee Planning Committee nung tayonger Wb .P. Talitemjen Jamir-i jubilee amongba osang agütsü.
Iba sentong tetenzüklen asürtem bilemtetba mapang tatsüka agi aser Akhoya Fellowship Kohima nung tayonger, Wb. I. Temjen Longkumer-i telok pelaa agizükba o metetdaktsü aser tatem nung Wb. C.Temjen Jamir-i tenzüka arurtem nem konang kuli kaket agütsü aser Wb.T.
Meren Paul-i shilem agirtem ajak dang pelaba metetdaktsü.
Iba sentong nung N.Chuba aser K.Anungla teloki ken tajung ka aten aser Obangnungla Jamir-i jubilee sangro tajung ka azüng. Tatem nung telok ajak pelatepa chiyonger senshi.
Iba sentong nung lenir Wb. L. Purkumzuk liasu aser AFK kimen Wb. T.Lulen Jamir-i sarasadema sentong tenzük.