Akhoya-i Clean Election pusema nungiter

Akhoya Senso Mongdang Golden Jubilee Nüngshilong sayatsür tebu tedi, Wb. L. Sanen Ao den putu yimsüsürtem aser ASM lenirtem noksa nung angur. Akhoya, August 04,2017.

Akhoya, August 04 (TYO): Akhoya sensosanger ajaki Nagaland Baptist Church Council, Ao Baptist Arogo Mungdang aser LKM Clean Election Campaign Committee teloktemi anir Nagaland nung election timi merüka agitsü inyakba sentong nung mapa küma shilem agitsü telemtetba agiogo.
Iba telemtetba ya Hokolbarnü Akhoya Senso Mongdang Golden Jubilee amongba mapang senso ajaki mulunga lemteta liasü.
Kasa golden jubilee sentong nung “meraket yimliyanger” ta asüba onük nung jembidang, “yimten yimli takok ngua inyakba nung T 4 , Tangatettep, Telongjem, Teyaritep aser Terenlok ya tongtibang nüktangtem lir,” ta tebu tedi Wb. L.Sanen Ao-i metetdaktsü. Wb. L.Sanen Ao ya Akhoya nunger aser Nagaland government nung Secretary jenjang tashi tongteta inyaka liasü.
Pai kasa Jubilee onük nung jembidang, timtem nung nübortem toktsür maoba aser nübortem tia meteta ajuruteptetba shisatsü tajung senso shia dak alitsüla ta metetdaktsu. “Tangar meyaritetba aser tenüngsang magutsütetba ajanga yimli ka meraket samar,” ta paisa metetdaktsü.
Paisa tayongzükba o ka ashidang, “taoba mapang indang masü saka tang koma lir (?) ta bilemdangtsübajiang tongtibangtiba asütsü ta metetdaktsü.
Ano paisa meraket yimli indang jembidang, “tanü lima nung pei temeten memetetba aser mebushiba ajanga pei meraket samar aser tangari mezüngmeshir, anungji senso shiai pei temeten meteta alitsüla,” ta paisa ayongzuk.
Iba sentong nung Akhoya nungertem rongnung tambuti ana Wb. Sakulepden (küm 100) aser Wb. Rendilemba Jamir (96) na den Akhoya Village Council mendenbuba Wb.S.Kilang nungertemi tepela of jembi aser Wb.C.Lima Jamiri tajungshi o jembia liasü.
Iba jubilee nüngo kaket Rev.Dr.Prof.M.Rongsen Lkr-i sayatsü aser ASM tir Wb. Rendikabai telok pelaa agizüka jembi. Iba sentong meraketdakja Akholongshi Club Akhoya-i sobaliba ken ka aten aser jubilee melepzüng o Jubilee Planning Committee mendenbuba Wb.I.Mar Longkumeri metetdaktsu.
Anepdang jubilee mong sentong metenzükdang, tebu tedi Wb. L.Sanen Ao-i golden Jubilee Nüngo long sayatsü.