Akhoya nung Tsüngremmong among

Akhoya, August 02 (TYO) : Tanü Nagland nung lanurtem aikati Nagaland dak nungi dang tajung ajak imlar saka lanurtemi Nagaland ajungtsü asoshi inyaktsula ta tanü Mongolbar nü Akhoya yimtak Tsüngremmong sentong nung Longleng assembly constituency nungi adoksang Nagaland MLA Wb.S.Pangnyui tongti tesemdanger o jembidang metetdaktsü.
Taoba küm ishika mozü mora achiba wara menokdangteti asen lima nung lanurtem taküm aika samogo, anungji tanübo iba ama mozümora achiba tatidangji kokteta lanurtemi pei lima aser nübortem asoshi tajung inyaktsüla ta metetdaktsü.
Tanü tensa yim o yim na aser nübortem rongnung putepa alitsü asoshi nüngdakba indang o ka ashidang, “asen sobaliba nung aksütepa putepa alitsübaji kanga tongtibang lir, iba jagi tebilemtsü aika koktettsü,” ta Pangnyu-isa metetdaktsü.
Alima renloka aotsüba nükla ka lemsatepdang, “Akhoya aser Changtongya lushi ya Eastern Nagaland asoshi süngküm tongtibang ka lir, anungji terenlok mapa nung nübortemi government den amalitepa inyaktsüla, Eastern Nagaland renlokbaji Eastern purtem kija atema masü saka Naga nunger ajak atema asütsü aser talisa Aortem asoshi tajangzük tuluba asütsü,” ta paisa metetdaktsü.
MLA Pangnyu-isa kaketshirtem dang yimtak yimtsüng nungi adokba tamalen tsürabur lenirtemi jenjang tajung ajangzükteta tajung inyakba mapatem bilemdanga nübortem asoshi teyarir tajung kaka akümtsü tayongzükba ka agütsü.  Onok ano tenük mesakteti alidang Aortembo joko talangka renloka ooya liasü, anungji mapa ajak nung tanü Aortem ya tamalen pur ama asütsüla, onok asoshi tajung inyaktsüba atema Aortem dang kanga pelar ta paisa shisem.
Wb.S.Pangnyu ya Yachem yimtak mezüng Yisu Khrista osang tajung agizüka amangba tsürabur kibong nungi adokba jabaso ka lir. “Ozü tsüraburi Yisu Khrista osang tajung magizük asünungbo aser nenok ajanga ozü tsüraburtem mamangdaktsü asünungbo, tanü ni tongtetba jenjang ya metongi lila,” ta paisa tepelaba o ka shisem.
Tanü Mongolbar nü Akhoya yimtak Tsüngremmong amongba ya Akhoya Shisaluyimer Telongjem tenzüker küm 75 ajungba tenüng nung kaketshirtemi ayongba sentong ka liasü. Iba sentong nung Yaongyimsen Kaketshir Telongjem, Unger Kaketshir Telongjem, Akholongshi Club, Akhoya, Akhoya Senso Telongjem Changtongya Town, Mokokchung aser Dimapur, Govt. Middle School Dimapur aser Kosalatsürtemi yartsüngsang aser sobaliba ken aten aser Changtongya Kaketshir Telongjem tir-i Tsüngremmong salem o metetdaktsü. Ano, sentong ayonger nungia AST tiri Tsüngremmong salem o metetdaktsü.
Iba sentong nungsa Tsüngremmong ratet tatar Wb.Akangnungsangi jembi aser Tenüngsang o Wb. A.Toshi Longkumeri metetdaktsü. Iba sentong tenzüka Akhoya Baptist Arogo sannüker Wb.T.Lanu-i sarasadem aser Longchara Baptist Arogo sannüker Rev.T.Yangeri sarasadema sentong atem.