Akhoya Shisaluyimer Telongjem-i Running Race ayonger

Dimapur, November 28 (TYO): Akhoya Shisaluyimer Telongjem (AST)-i ‘Temeket alir nüburtem den tali tesendaktep akatsü’ nükjidong nung taruba December 6 nü Running Race tetoktepba ka agitsü ayongogo.
AST tenteter küm 75 tain akümba Platinum Jubilee benjungmong nüngtem nung AST-i küm tepiyong sentong balala aika agia aruogo aser tan tetoktepba sentong nung shilem agirtemi anepdang 8:30 ako nungi tenzüka, Chantongya Town Public Ground nungi Akhoya Play Ground tashi asemtsu.
Changtongya jila temeket tesemtem nung aser tejangrar ajungai iba tetoktepba nung shilem agitsü akok aser tetoktepba nung 1 buba, 2 buba aser 3 buba jenjang ajangzüker nem senpet sen agütsütsü renema lir.
Head Master, R.C.Chiten Jamir Memorial Government High School Changtongya Town, N.Temsu Longkumer-i tenzükja iba tetoktepba agitsü renemogo.
Running Race tetoktepba temli, Akhoya Play Ground nung Mokokchung District Cricket Association (MDCA) tenteter küm 25 ajungba Silver Jubilee nüngtem nung ayongba MDCA telok aser Changtongya Town Administraion (CTA) telok na tsüngda friendly cricket asaya ka asayatsü aliba yong temeket nung aliba yimtsüng aser jila ajak nungi nüburtemi longsoa aruba iba sentong nung adentsü ayongogo.
Asemteptsü tetoktepba den sentakba osangtsüsang tali jangjashitsü jangrartemi Mobile No. 8974893602 mesüra 8131860699 ajanga tongteprateptsü akok.