Akhümtsübutep melira ni senso meshitsü asü (?): Adnan

December 13, 2015: Linük nung akhümtsübutep mali ta o toktepba mapang ka nung taküm küm tetenzüklen India nung alitsü atema mepishisang aser Pakistan nunger nüngtugu kentener Adnan Sami-i, linük nung akhümtsübutep melira pai India senso meshitsü asü, ta asüngdangogo.
“Linük nung akhümtsübutep melira ni linük nung senso meshitsü asü ? O dang nungibo ni mapa nungang tamang akar,” ta sentong ka nung Sami-i ashi.
Taküm August ita tashi India nung alitsü atema Sami nem temelaba agüja liasü. Pa linük tesemdanger visa nung India-i aru aser March 2001 nungi India nung alir.
‘Bhar do jholi meri’ ken atensang Sami-isa Pakistan nunger ghazal kentener Ghulam Ali Mumbai aser Pune na nung kenten sentong akatsü temelaba magütsüba atema jembia liasü.
Iba dak sentakba nung pai, “Atangji pa nem shilem agidaktsütsüla. Ajaki shilem agitsüla. Music nung sentsü mesüra tamangba yimsü mali. Ni ken ka angara ni sentsü, tamangba yimsü, linük mesüra ken atensang indang kecha mesükshir,” ta ashi.