AKM 67 buba lokti senden meraketa tenzükogo

Nagaland Urban Development Advisor, Wb. S.I Jamir-i Changtongya nung AKM lokti senden sentong lapoktsüba angur. January 18, 2017.

Changtongya, Jan 18 (TYO): Ao Kaketshir Mungdang (AKM) 67 buba lokti senden “Masetshiba Yokji” omen dak ajemdaker Bodbar aonung yangi Changtongya yimdak meraketa tenzükogo. Iba senden nung AKM kübok aliba unit balala nungi tejaoker meyi ana shi adenshia shilem agia mungdagi.
Mungdang lapoktsür taoba AKM tir aser tang Nagaland Urban Development Advisor, Wb. S.I Jamiri jembidang, British yimsüsüba mapang tenokdangba jenti liaka 1929 küm asen lenir ishika lungjemer AKM ya tentet. AKM tenzükbaji zübazüba tentetba masü kechiyong iba mapang tensa tiaji tang amai mali asü, ta paisa AKM mezüng tenzükertem nem tenüngsang agütsüba o ka lemsatep.
Tanü putu lanurtem dang meranga züngang ta ashitsü menüngdaker, kechiyong lanurtemi kechi azüngtsü ajakji meteta dang lir, aji saka, lanurtem dang shinüba kaji; asen Naga lokti nung teraksa alibaji kodasür anendaktsütsü ta asübaji dang khuret bendaktsünür, ta paisa ashi.
Asen lima mapa kecha inyak majung tuluba nungi tenzüker tilaba tashi teraksa agi süngogo, asen lima terenlok mapa shitak meinyaktetbaji item tebilemtsütem jagi meinyaktetter, anungji lanurtemi temelenshi ka tenzüktsüla, ta paisa inyakdaktsünüba olen ka ashi. “Lanurtemi temelenshi ka yakta metenzükra teraksaji manentsü aser asen lima kodanga tejakleni maotsü”, ta paisa shisem.
Tongtibangsa asen lima election agiba yimya ya kanga majung, election nung mapa tamajung ya Ao kini anir Naga lima ayimsünga ao. Iba inyakyim (election malpractices) ya manen tashi asen lima lenir tajung kodanga madoktsü, ta paisa ashi.
Lanur tajung aika lir, aji saka, parnok ket nung rongsen makaba ajanga election nung metoktepteter, anungji, taoba mapang AKM ajanga Ao kin lenla balala nung tejakleni aoba amaji iba mungdang nung bangzüng tajung kar renema temelenshi ka bener arutsüla, ta paisa tayongzükba ka agütsü.

Taonung mungdang lapokba sentong magidang, Ao Kaketshir Mungdang tir Sp. L Jemti Longchar-i AKM wako akhümketa salatsü. Sentong nung Mokokchung DC Wb. Sushil Kumar (IAS)-i tayongzükba o jembi. Changtongya Village Council Chairman Wb. Imnakümzük Longkumeri tarur ajak pela agizük. Changtongya Baptist Arogo Pastor Rev. I.Wati Jamiri tekülem mapang tatsüka agia liasü. Mungdang choir aser Ao Kaketshir Telungjem Dimapur nungi ken ajanga mungdangsanger ayongzük.
Jan 19 nü anepdang sentong nung Election, National Highway and Mechanical, Minister Wb. Nuklutoshi tongti tesemdanger asütsü jaoka lir aser nikong sentong nung Oriental Theological Seminary Dimapur nung Principal Rev. Dr. Wati Aieri mongdang omen “masetshiba yokji” onük nung ajemdaker tongti o jembitsü. Aonung “benjongang kaketshir” ta sür kentenmenü sentong ka alitsü renema lir. Iba sentong Jan 20 tashi alitsü.