AKM Corpus Fund Committee-i mang ayimer

Dimapur, February 15 (TYO) : Ao Kaketshir Mungdang (AKM) Corpus Fund Committee-i asür J. Ngangshikaba Aier mang ayimer aser pai iba akümli toktsür aoba atema temulung shiranger, ta sangdong ka nung metetdaktsü.

Iba takoksa mapang onoki asür J. Ngangshikaba-i mapa tajung inyaka yutsübatem bilemteter. AKM-i rongsenren tsütsü tangar dang nungi teyari magii inyaksangshitettsü asoshi inyakba mapa aser AKM mungdangtem asoshi tenla saruba yimya anenba nung asür J. Ngangshikaba-i shilem tajung agi aser item mapa tajungtem ajanga Corpus Fund Committee len anir.

AKM Corpus Fund Committee-i mangdang aketba lennir ka samaba asoshi kanga sasar aser par kibong den asüku lemsateper, ta sangdong nungsa metetdaktsü.