AKM & DBM-i tazüngba nung tim lenmang shimtsü shisalen agütsü

Imnalensa IPS (abelen) den tanga shisalen sayur Dr. Kilang, Supongchiten aser AKM tatong tir Akümmeren Lcr noksa nung angur. Mokokchung, May 18, 2016.

Mkg, May 18 (TYO): Ao Kaketshir Mungdang (AKM) aser Divine Bridge Ministries (DBM) na lungjemer Bodbarnü yangi “Career Guidance Seminar” ta ser shisatokden sentong tajung ka “Shitak shimba, tarutsü jenjang tajung” omen nung ajemdaker Longkumer Kilem Mokokchung nung takok ngua liogo. Tanü iba sentong nung kaketshir aser tsüraburtem aika arua shilem agia aden.

Iba sentong ya tongtibangsa kaketshir aser tsüraburtem nem tim lenmang tuyutsü nükjidong yur ayongzükba lir. Sentong nung shisalen sayurtemji; Mokokchung SDPO, Imnalensa IPS, Dr. Kilangwabang (IMDH), Supongchiten (Director DBM) par asem liasü. Shisalen sayurtemi tensa den apet lenla balala nung tim lenmang shimtsü kaketshir aser tsüraburtem ajungshia liasü.

Mezüng shisalen sayur, Imnalensai civil service tetoktepba dak sentakba onük nung jembidang, kaketshir shiai nükjidong tejangja ayuba den ibaji atongtsü asoshi tesadem shisatsü alitsü nüngdaker, ta metetdaktsü.

Taküm nung tim teinyaktsü/taotsü lenmang shitak metetba den takok angutsü asoshi tazüokbaji kangasa tongtibang lir, ta paisa ayongzüka ashi.

Paisa ashiba agi, tatidang balala atema school züngyonga atuba ‘academic record’ aser coaching agibaji tongtibangba masü, aser tulur-takartemi dang tatidang balala nung takok angur ta mali, saka “shirnoki nendaka aser meranga azünger parnoki dang takokji angur”, ta metetdaktsü.

Tatidang tapu balala indang ashiba den koma azüngtsü aser koba kakettemsa azüngtsü, aser tatidang dak sentakba nung nüngdaktem koba ajanga ngutettsü, item indang pai ajangshibatem tatongi lemsatep.

Tanabuba shisalen sayur, Dr. Kilangi technical azüngtsü jangrartem atema tazüngtsü lenmang balala tuyuba den tanü tensa luyim balala nung professional nübu nüngdakbatem indang lemsatepa liasü.

Paisa tsüraburtem dang ajungshinüba olen ka ashidang, tsüraburtemi mulungba nung masü saka pei chirnurtemi jangraba aser parnok sempet aser tashi meteta iba lenmang jagi yoktsü asoshi tayongzükba agütsü. ‘Nisung kati takok nguaka, ibaji pai/lai jangraba profession ka mesüra yangji tepela mangutsü, ta paisa shisem.

Tasembuba shisalen sayur, Supongchiteni education dak sentakba onük nung ajemdaker jembidang, tazüngbaji mapang indoktsü “time pass” atema dangbo mazüngtsüla, saka tangar dang nungi alakteta tajungba asütsü merangtsüla, ta tayongzükba ka agütsü.

Paisa lanurtem dang science, mathematics aser technology luyim tsütsü temulung agütsütsü ashi. Kechiyong tanü putui item nung mongintem nüngdaker aser itemji meteni alimaji marakzüteter, ta shia liasü.

Kaket reju tajung nung azüngba ajanga education tajung angutsü aser education tajung angubaji ajanga na atema dang masü saka lokti dena ajangzüktsü, ta ashi. Education tajung angurtembo company tulutemi itasen tajung agüja ayutsü rakteper, ta paisa shisem.

Nagaland nung tsürabur aikati pei chirtem doctor aser engineer dang züngdaktsüner. Tanü alima kanga kara aor asünung, tanga tazüngtsü luyim aika lir aser itemji zünger mapa angutsü maongka/ngujem jenti lir, ta paisa kuli kar dena metetdaktsü.

Tanü Aor tejakleni maoba kuli kar ashidang, tanü lanurtem azümesenba agi lenmang aisü nung takok mangur aser iba den Tsüngrem akhümtsübuba agi anünga lir, ta ashi. Aorji samanir aser Ao kin ta asüba nung temulung lemer kazüteper aika lir, ta paisa Aor tia indang tebilemdangtsü olen kar lemsatep.

Sentong nung AKM tatong tir, Akümmerenia mapang tatsüka agia jembidang, Divine Bridge Ministries ajanga tim lenmang sayua ratamata alir kaketshir aika tajangzük ngudakogo, anungji, par mapa tajung asoshi tenüngsang agütsü.

DBM ya Supongchiten aser pa kinüngtsü Moanaro Ao nati tenzükba lir. Ibai Delhi nung amendaker India aser bendangli tesem balala nung ministry tapu balala inyaker. Item ministry-tem rongnung DBM kübok EduAide Career & Counseling Service ya jangratemtsü ka lir. Iba mapatong ya AKM den yaritepa asen liso kaketshirtem nem luyim balala nung India limai oa azüngtsü asoshi parnoki angati tetuyuba (free service, guidance & counseling) balala agüja arudaki.

Class 10, 12 aser degree balala nung takok ngur koba reju nung azüngtsü ta ratamata alir kar danga lira AKM ketdangpur mesüra DBM kar den tongtepratepa iba angati maongkaji agitsü akok.