AKM-i 2 buba Nokdenlemba Volleyball asayamong ayonger

Dimapur, September 28 (TYO): Ao Kaketshir Mongdang (AKM)-i taküm November ita 11-13 nü tashi 2 buba Padmashree W. Nokdenlemba Volleyball Trophy Mokokchung kübok Multipurpose sports complex nung asayatsü ayongogo.
Iba asayamong nung shilem agitsü jangrar telok ajungai asayamong nung shilem agitsü shiti AKM office nungi agizüktsü olen ka asayamong tayonger convenor, Aodangnok aser AKM Assistant General Secretary, S. Shilukaba Longchar nati tanü sangdong ka ajanga metetdaktsüogo.
Iba shiti den shilem agitsü taa sen 2000 tuloktsür temonoba agi taruba October ita 31 nü tashi nung office tongtsütsüla ta tenati sangdong ajangasa metetdaktsü.
Iba asayamong nung mezüngbuba aser tanabuba jenjang anguba telok ana nem senpet sen 80,000 aser 50,000 agütsütsü renemba den külemi, semifinal nung tamakok ajuruba telok shia nem senpet sen 15,000 aser Player of the Tournament, Best Spiker aser Best Setter shilem nung individual sempet agütsütsü renema lir.
Ano, iba asayamong nung shilem agir telok shia nem tarutao sen 3000 agütsütsü renemogo.
Tan asayamong den sentakba osangtsüsang tali jangjashitsü jangrartemi Convenor den mobile no. 9615772358 mesüra Sports-in-charge den mobile no. 8414878297 ajanga tongteprateptsü akok.