AKM-i 54 buba Tesayurtem Anogo ayongzüka amung

September 5, 2015 nü Mokokchung Town Hall nung 54 buba Teachers Day sentong nung District level, sub-divisional level aser EFOM Achievers sempet angurtem den tongti tesemdanger Tourism Parliamentary Secretary, C Apok Jamir aser tetushi süa jaoker, I Anungba Sanglir (ADS, F&CS, Dimapur) na den AKM mendenpurtem külemi agiba noksa angur.

Dimapur , September 6 (TYO) : September 5, 2015 nü Town Hall Mokokchung nung AKM-i 54 buba Teachers’ Day sentong ayongzüka agiogo.
Iba sentong nung Tourism Parliamentary Secretary, C Apok Jamir-i tongti tesemdanger aser ADS, Food & Civil Supplies, Dimapur, I Anungba Sanglir-i tetushi süa jaoker ama shilem agi.
Sentong nung tongti tesemdanger C Apok Jamir-i o jembidang, tesayurtemji linük yangertem lir ta shia tenüngsang agütsü.
Paisa ashiba agi, “Tesayurtem Anogo amungba ya benjung ka dang masü saka asenoki (tesayurtemi) pei mapa meyipa reprangshiba mapang ka lir.”
“Asenoki (tesayurtemi) loktii aginüba ama shilem agir asü masü aser bendanga agüja inyaker asü masü ta shisadangtsüla. Tanü putu nung technology ajanga shisaliok sayuba inyakyim nung temelenshi aika bener arutsüogo. Ajisüaka, temelenshitem liaka, inyakyim ka memelenshi aser ibaji loktii aginüba yimyatsüya tajungtem sayubentsüba lir.” ta C. Apok-isa metetdaktsü.
Ochishiba, telongjem, meranga inyakba nunger amala tangatetbatem kasa dang lir aser itemji maneni bener aotsü atema tesayurtem aser kaketshirtem dak dang keta lir, ta paisa ashi.
Tanü Tesayurtem Anogo amungba dang masü saka tesayurtem, kaketshirtem aser yimsüsürtemi tang asen lokti tensa aser talisa taküm Mokokchung jila küm 125 benjungmung amungtsü alibatem atema shisadangtsüla,
Iba anogo nung asenoki tesüiba mapang takok ngua inyaktetbataem aser ano tamakok angubatem ajak meyipa reprangtsüla. Asen gari lenmang tia, electricity khuret nungertem shisadangtsüla, ta C Apok-isa ashi.
“Ochishia shidi süra, nibo khenyongi temulung masür aser ni bilemer nisung ajaki temulung mesüi bilema alitsü” ta paisa shisem.
Tanü kaketshirtemi taruba küm 25 dak rangloker inyaktsüla aser küm 150 benjung amungdang nenoki Mokokchung jilaji koba tashi ka nung melenshir lidaktsünür ta mangdang yur inyaktsüla, ta paisa kaketshirtem ayongzüka jembi.
Iba sentong nung tetushi süa jaoker I. Anungba Sanglir-ia o jembidang ashiba agi, tesayurtemji linük yangertetertem lir aser tesayur mali nungbo temetetba angazükdak malitsü.
54 buba Tesayurtem Anogo sentong nung Jubilee Memorial School-i sentong lapok aser AKM tir, L. Jemti Longchar-i tesentepertem pela agizük aser DEO, Mokokchung-i anküp tepela o jembi.
Sentong nungsa AKM aser Teachers Award (District Teachers Award, Sub-Divisional Award & Achievers Award (by Education Forum of Mokokchung) nungertem agütsü.