AKM-i acha-ayanga Tuli nung CFR Training agi

Alima nung ajungben lendongtsüdong atalokba mapang jet ta nüngdakba purtem yaritettsü asoshi inyakyim sayuba sentong ka  Tuli Block nung ayongzüka agiogo. Iba sentong ya anogo asem nü agia liasü aser nisug 60 tashi shilem agia angazükogo. (Photo coutesy : AKM)  

Tuli (Mokokchung), August 30 (TYO) : Alima nung ajungben lendongtsüdong atalokdang renema lidaktsütsü nükjidong nung Tuli ADC Block nung Community First Responder (CFR) training agiogo.
Iba training ya Community Hall nung August 29-30, 2015 anogo agi aser Tuli ADC Headquarters kübok yimtsüng trok nungi nisung 60 nem tesayuba agütsü.
Mokokchung district nung tang agiba ya CFR training shilem tanabuba lir. Mezüngbubaji August 24 -26, 2015 nung Mokokchung jila nung agi. Iba sentong ya Nagaland State Disaster Management Authority (NSDMA) aser District Disaster Management Authority (DDMA) nati Ao Kaketshir Mungdang (AKM) den yaritepa agir.
Honibarnü SDO (C) Tuli, Arikumba-i CFR training lapoktsü aser shisalen sayurtemji Dr Chibenthung Kithan, Medical officer- State Master trainer for NSDMA (Home) aser Project Officer DDMA Mokokchung, T Wangshi Jamir na liasü.
Tena den külemi Civil Defense & Home Guards (CD&HG) personnel temi shilem agirtem nem practical training sayu.
Tuli jila dak rangloker sentong ayongertemi tzü den sendakba disaster management indang training timba agüja liasü.
Küm ishika tejaklen Milak ayong nung tzü talila ayimba ajanga Tuli nung tesem aika tzü agi metsüngbang. Iba lendong nung tia kaa nisung takümbo melalu saka sen crore aika indang rongsen akoksa.
Tang agiba training nung teayurtemi tzümetsüng ajurudang plastic galloons, süng aser item mesükba osettemi rong yangluba, first aid agütsüba aser anentsüh lendong nung teinyaktsütem indang tesayuba balala agütsü.
AKM-i iba CFR training nung kanga dang bendanga aser temulung agüja yaritepa arudar, ta repsem tezüluba, S Shilukaba Longchar-i sangdong ka ajanga metetdaktsü.