AKM-i ayongba ‘free coaching class’ tenzükogo

Ao Kaketshir Mungdang (AKM)-i kümshi ayongba class 10 pur atema “Free Coaching class” tenzükba sentong nung coaching agitsüpurtem den tesayurtem aser AKM ketdangsertem külemi AKM coaching hall nung tangokba noksa nung angur. Taküm HSLC agütsüshir (repeater) ajak agi parnok 23 lir. Aug 23 nungi coaching class-ji tenzüktsü. (Mokokchung, August 22, 2016)

Mokokchung, Aug 22 (TYO): Ao Kaketshir Mungdang-i kümshi ayongba class ter (HSLC) pur atema ‘Free Coaching Class’ sentong taküma AKM coaching hall Mokokchung nung tenzükogo. Iba coaching class ya tongtibangsa kaketshir shirnok class 10 nung tamakok ngur lir, parnok atema angati iba sentong ya katsür.
Tanü iba coaching tenzükba sentong tongmelang ka agidang, AKM tongti zülur Sp. Bendangkümbai coaching agirtem dang, AKMi rongsen jenti indoka iba ama coaching ayongaka, kaketshirtemi temulung magütsüra, item ajak ya amajok dang asütsü, anungji, ajaki nendaka angazüker takok tajung angutsü merangteptsüla, ta tayongzükba ka agütsü.
Taküm kaketshir parnok 23-i iba coaching class nung adentsü. Iba coaching class nung ya Mathematics, Science, English aser Social Science subject-tem sayur. AKM-i achayanga item subject-tem nung tesayur takutet shima parnok nemji sayudaktsür, ta Bendangkümbai iba osangbener den jembidang metetdaktsü.
AKMi iba coaching maparen ya tenzüker taküm agi küm 19 buba arur aser kümshia tajungba tajungba akümer. Yaküm yangi coaching agir katibo 92% nung takok ngua lir. Yaküm iba coaching agir noklang shilem nung 80%-i takok angu, ta paisa shisem.
Iba free coaching class mapatong dak sentakba nung senso nübur aikati tangatetba nung nübu, rongsen aser shisatsü agi nungitba ajanga tanü tashi takok ngua arudaki, anungji, teyariteper ajak dang pelaba paisa lemsatepa liasü.