AKM-i CAB anema India Republic Day mokdangtsü

Dimapur, January 24 (TYO): Naga Student’s Federation (NSF)-i tuyuba nung ajemdaker AKM-ia India Republic Day, January 26, 2019 anogo mokdangtsü ta metetdaktsü.
Citizenship Amendment Bill 2016 osang angashili nungi AKM mesüngjemteti aliba January 8, 2019 anogo Lok Sabha nung iba Bill agizüka Rajya Sabha dangi yoker agizüktsü aser temzüng küma aotsü atema atatepdar. Iba osang ya angashia Naga kin kija atema dang bilem nunga tajemtsüka aser tanü asen lisopur nüsotem temeden meilongi samaa aotsü aser tajemrepba kin ka kümadoktsü, ta AKM President Imkongwati aser Information & Publicity Secretary Nekmi Longkumer nati ashi.
Citizenship Amendment Bill 2016 ya yimmaker ka ta AKM-ibo angateter aser iba Bill ya India sorkari temzüng ka küma aotsü apusoba yabo khenyongi magizükteter aser tatem tashi nokdaktsü. Anungji NSF-i ayongba ama Mokokchung District litsü kübok AKM-ia mokdang ayonger aser iba anogo school aser college ka nungi danga kaketshirtem sentong nung madentsü aser shilem magitsü tetuyuba agütsür, ta AKM-isa metetdaktsü.
Iba den külemi Aotsür Aor ajak dang, iba ama mera ya tangar kar atema masü saka pei kin, pei nüso wazüka ayutsü atema nokdaker asünungji tangatetba tulu nung senso meimertemi January 26 Republic Day sentong agiba nung shilem magitsü aser madentsü atema ayongzüker, ta parnokisa shisem.
Iba anogo shiri AKM tetuyuba anema inyakdir, parnok dang kin anemertem ta ajatsü aser tapet mera agia parnok atema kecha nunga kuli mesütsütsü metetdaktsür, ta AKM ketdangpurtemisa ashi.