AKM-i Imtiyapang aser Shilukaba na nem tetushi agütsü

Mokokchung, June 10 (TYO): Tawa Tzürangkong nung Naga Students Federation (NSF) lokti mungdang alidang, NSF nung tongti zülur asütsü Sp. Imtiyapang aser metetpela zülur asütsü Sp. S. Shilukaba Longchar na shimtetba nüngtem nung Ao Kaketshir Mungdangi tena nem tenüngsang aser tetushi agütsüba sentong tajung ka AKM senden kilem nung ayongzüka agiogo.
Tanü iba sentong nung taoba NSF tir Sp. Imchatoba Imcheni tajungshi o jembidang, NSF sabang ya tila ka dangbo masü kechiyong iba sabang yagi Naga nunger songjen atema inyaker, anungji, Naga nunger arok ajungtsü asoshi nükla yur meranga inyaktsü, pai tayongzükba ka agütsü.
“Nena ya AKM meyonger kaka lir, anungji, inyaksangshi ajak nung talisa keno balala adokdang AKM den tongtepratepa inyakang”, ta paisa inyakdaktsünüba o ka ashi.
Paisa NSF inyakyim tongti kar lemsatepdang, kaketshir terenlok maparen balala den repsema NSF yagi Naga yimden tebilemtsü atema ya temulung agüja arur, iba den ano state aser centre sorkari sentong (policies) tapu balala yangluba nunga shilem agitsüsa akümer, ta ashi. Iba ama maparen balala inyakdang shisa kaa inyaktsü asoshi paisa tekümdangtsü kar dena lemsatep.
“Naga nungeri Ao kin nungi kanga imlar, anungji, maparen ajak nung sadanga/lemdanga masü saka Naga nunger telungjem asoshi ochi shia, nendaka aser meranga inyaktsüla”, ta paisa ajungshia liasü. NSF ya AKM-i shilem tulu agia tenzük asünung, yangi Ao kin khuret tulu lir ta bilema inyaktsü asoshi paisa ayongzük.
NSF nung inyaktsü shimer Imtiyapang aser Shilukaba na asoshi Mokokchung Town Baptist Arogo (MTBA) Assoc. Pastor Wb. Temsüwati Kichui Laishiba tekong kar zünga temoatsü meshia sarasademtsü.
Iba sentong nung AKM tenzükertem den Ao Senden, Watsü Mungdang aser Mokokchung Town Lanur Telungjem (MTLT) nungia tenzükertem arua aden. Sentong nung Imtiyapang aser Shilukaba natia shilem agia tepela o lemsatepa liasü.