AKM-i Interview anogo tekaraba nung metetdakjang dang akhanger

Dimapur, Nov. 20 (TYO) : Ao Kaketshir Mungdang (AKM)-i Deputy Commissioner office aser district administration dangi temepishiba shidi ka agütsüogo.

May 5, 2015 nü temsüa alirtem mapa balala asoshi July 25, 2015 nü interview agitsü ta sangdonga liasü, aji oda süaka Mokokchung jila nung senso süa alir bendanger nem admit-card agütsüba maparen nung mangatettep kar adokba ngua AKM-i July 6, 2015 nü ketdangpurtem den ajurutepa iba mapa tekaratiba nung bentettsü shiogo, ajisüaka lemteta aliba interview tang tashi magiteti arur, ta AKM shidi nung shia lir.

Sorkari iba aibelen melenshir südi ta bilema AKM-i ita pezü tashi kanga arema ataogo.Aji oda süaka, iba dak sentakba nung district administration mesüra sorkar nungi tang tashi nung kecha osang mali aser ibaji ajanga Mokokchung nung alir Naga nunger lisopur meyirjang aika interview jaoktsü atema kanga yongseta atateper, ta AKM Tir, L. Jemti Lonchar aser tongti tezülur, Bendangakum Aier nati sangdong ka ajanga ashi.

Mezüng jembiba ama iba interview nung Naga lisopur dang shilem agidaktsütsüla, kechiba süra Naga nungera item mapa inyaktettsüsa tazüng tashir peria lir. Anungji district administration tiptema aotsü asoshi aser kaketshirtem meji tekaratiba nung interview anogo latetjang, ta AKM-i agütsüba temepishiba shidi nungsa shia lir.