AKM-i nisung tepseter yakta pua merenshidaktsüner

Mkg. April 11 (TYO) : March 20, 2017 nü Dimapur nung Mongsenyimti nunger Lanunükshi tepsetba maparen nung tang tashi nisung tepseter pua marutetba asoshi AKM-i shisabolua bilemba ken o ka metetdaktsüogo.
Iba lendong ataloklibo Dimapur police-i nisung tepsetertemji aputsü merangba osang angashia temulung süa liasü saka tang tashi nisung tepseter pua marutetba asoshi mepelai bilemer ta AKM-isa metetdaktsü.
Nisung tepsetba mapa nung temulung malem bilemer noksa dena osangkaket nung sangdongba mapaji kanga süoki ia inyakba mapa ka liasü, iba jagi ajaki police dak temulung lemteta liasü, ajisüaka hopta asem süiaka kecha tsüngsüa mali süidaktsübaji tesasatsüka lir ta AKM-isa metetdaktsü.
Anungji, ozüng amshirtemi tatsüba nung nisung tepsetba mapa nung dena alirtemji aputsüla aser tasür kibong nem ochiobendang agütsütsüla ta AKM-isa metetdaktsü.
Iba ama nisung tepsetba maparen nung adenertem anioka kibong kari lidaktsürsa majungtsü ta AKM-isa metetdaktsüogo.