AKM-i OKM pusema nungiter

Dimapur, October 11 (TYO) : Ongpangkong Kaketshir Mungdang (OKM)-i tawa Sungkomen Ward, Mokokchung nung aliba AOC petrol pump nung tim masüba inyakba putetba atema Ao Katekshir Mungdang (AKM)-i tenüngsang agütsüba den OKM-i maneni nübortem asoshi inyakang ta ayongzükogo.
Iba dak sendakba nung District Administration, Police aser Legal Metrology & Consumer Protection Department temi mapang shitak nung tim mapa inyakba aser bushisüngdang metembang tashi AOC shibangtsüba atema pelar, ta AKM General Secretary, Bendangkumba Aier aser Vice President, Akummeren Longchar nati sangdong ka nung metetdaktsü.
AKM-i Ongpangkong Kaketshir Mungdang pusema nungiter aser ozüng amertemi aibelenertem ozüng tapet kübok merenshi akhanger, ta AKM mendenpurtemisa ashi.
Iba ken o bushisüngdangba mapa nung tim mesüi inyakba kar ajitetra aser nübortem nem takoksa bener arutsürtem medentsüsa mapa inyakra, AKM-i iba anema mapa inyaktsü, ta mendenpurtemisa tekümdangtsü olen ka shisem.