AKM-i ‘Survival Mokokchung’ atema metetdaktsür

Dimapur, August 13 (TYO) : Bendanger shirnoki temzüng ozüng ladanga aliba kübok India senso ta tejangja kuli maka, parnok dang ‘Illegal Immigrants’ ta ajar aser item senso makartem ya mitsük mesen ama aiter asen Aor sobaliba ayak, senmang aser temeden den lika lim tashi amokmerener anungji iba tebilemtsü nungi kümzüktsü nükjidong nung Ao Kaketshir Mungdang-i ‘Survival Mokokchung’ ya 2007 küm tenzük ta maneni lepshia AKM menden ajanga sangdong ka nung metetdaktsü.
AKM menden ajanga ‘Survival Mokokchung’ maparen nung kija kibong aser lokti balala-i rongsen, nübu aser shisatsü agi yaritepa nungitba atema kangasa pelar, ta AKM Tir, L. Jemti Longchar aser Tongti Tezülur, Bendangkumba Aier nati sangdong nung shia lir.
AKM-i iba inyakyim ya Ao kaketshir yimkong mungdang nung lemteter Ao kin merüka nokdaktsü aser menenmechi sobaliba agi asen tarutsü tia meraksadaktsütsü tangatetba nung nüngsenbangsen agia inyaka arudar, anungji Aolisanger kaketshiri inyakba maparen nung kija mesüra lokti shirnoki tenokdangba agütsüdir Ao Kaketshir Mungdang-i tatok magütsütsü aser iba maparen anema jangjongmarartem dang Ao kin ashioktsür aser külakoktsürtem ta züngshitsü ta AKM sangdong nungsa metetdaktsü.