AKM-i tang teyangludak Mkg-Mariani lenmang semdang

Mokokchung, Tsüklai 8 (TYO): Tsüklai 6 nüto Ao Kaketshir Mungdang (AKM)i tang teyangludak Mokokchung-Mariani lenmang NH 702D repranga jajaba mapang tesem-tesem nung junga meinyakba aser talisa tesem kar nungbo mapa ano junga tenzüka maoba indang nguteta liasü, ta AKM ketdangpurtemi osangzülurtem den jembidang metetdaktsü.
Repranga aoba mapangji tongtibangsa kilometer 50-63 nungbo mapa junga metenzükteti lir, anungji, AKM ketdangpurtemi lenmang yanglurtem dang tekaratiba nung mapa tenzüka aotsü asoshi mepishia shiogo, ta parnokisa ashi.
Ano tesem-tesem nung temulung mesüi alibatemjia junga yanglutsü asoshi teinyakertem dang shiogo, ta parnokisa shisem.
Iba mapa agizüker contractor kar denbo ajurua jembiogo, aser department nung ketdangsüra karbo ajuruogo, saka ano contractor kar majuruteti lir, anungji, parnokji tekaratiba nung ajurutsü, ta AKM purisa ashi.
AKM-isa nüburtem dang inyakdaktsünüba o ka ashidang, teinyakertem mapa sadem-sadema inyakdaktsütsü asoshi ajaki lenmang yangluba maparen nung amalitepdaktsünür, ta mepishia metetdaktsü.
Iba lenmang ya junga meyanglu tashi aser mapa takok ngua tembanga maru tashi AKM-i maneni mita atatsü, ta AKM ketdangpurtemisa metetdaktsü.