AKM ketdangpur menden melentepogo

Mokokchung, March 18 (TYO): Ao Kaketshir Mungdang (AKM) ketdangpur menden melentepba sentong ka Honibarnü yangi AKM conference hall Mokokchung nung meraketa agiogo. Iba sentong nung AKM ketdangpur tejen aser tasen shimertem den taoba mapang AKM tenzüker taintem kar densema liasü.
Tanü iba sentong nung Ao Milen Committee tayonger tsürabur Wb. M.B Longkumeri mapang tatsüka agia tajungshi o jembidang, AKM sabang ajanga lenla balala nung nübu tajung aika adokogo, aji oda, maparen ajak nung AKM nükjidong mamadoki inyaktsü asoshi ajungshia liasü.
Tejen pur shirnoksa AKM menden balala nungi sodi nguogo, parnoki tang tasen shimertemji maparen ajak nung shisatsü agüja nungittsüla, ta paisa ashi.
“Tsüngrem dang shisatsü meshia inyaktsüla aser sarasadem nung akangang”, ta paisa AKM tenzükertem ajungshia liasü. “Shirnoki Tsüngrem dak tamang yur inyaker, par telokji memoatsüiang malitsü”, ta paisa shisem.
Taoba AKM tenzüker tsüraburtemi timtem jenti ajuruaka, par mapang mapa tajung aika inyakogo, tatishitsü agi; Nagaland ajunga nung meyi sodi lirumedema amungba, Mokokchung nung Law College tenzükba, AKM meyong kiojen yutsüba, corpus fund tenzüktsüba, koda masürtem nem angati coaching class agütsüba, asen lima wazüka ayutsü asoshi Survival Mokokchung tenzükba, Ao Milen osang kaket adokba item ya jangratemtsü lir, ta paisa taoba lenirtem tenüng sanga ashi.
Paisa iba dak sentakba nung ashidang, “taoba mapang asen tsüraburtemi inyakba amaji lanurtemia inyaktettsüla, mezüngpur ta asüba nungji temulung sür melili saka lenir ka ama tasü ita inyakang”, ta tayongzükba ka agütsü.
Ao lima nung lemsaba/lemdangba mopung ya kanga sashia ondaki, anungji, iba mopung tamajung anema asenoki lenmang kar bushia inyaktsü nüngdakba indang paisa lanurtem ajungshia liasü.
Sentong nung AKM tir Sp. L. Jemti Longchar ajanga menden toktsüba o aser tang tasen shimsang AKM tir Sp. Imkongwati Lkri menden tasen agizükba o jembia liasü. Tang tasen shimer AKM ketdangpurtem asoshi temoatsü meshia Youth Alive Ministry Director, Mar Longchar-i sarasademtsü.
AKM Tribunal General Wb. N. Akok Longkumeri menden melentepba mapang agia tasen shimer ketdangpurtem tenangzükba maparen ketdangsüa liasü. AKM senior executive Wb. Chubawati Lcr-i tepela o jembi aser iba sentong nung AKM women coordinator Easter Imchen menden liasü.