AKM küm 100 ajungba jubilee mong atema Waromung-i renemshidar

May 02, 2019 Brehostibarnü Mokokchung district kübok Waromung nung Moatsümong sentong agiba mapang, Aong Reju Cultural Organisation, Kohima-i sobaliba tsüngsang ka sayaba yangi noksa nung angur.

Waromung (Mokokchung), Monupii/May 02 (TYO): Aor indang sobaliba benjong tulutiba – ‘Moatsü’ anogomung nung Tsüngremer temaotsü meshizüka aser iba denji külemi Waromung yimdak Ao Kaketshir Mungdang (AKM) küm 100 ajungba jubilee mung amungtsü terenemshiba sentong ka ama, Waromung Shisashir Telongjem-i Moatsumong (Moatsu festival) benjong tulu ka May 01, 2019 anogo ayongzüka mungogo.
Iba sentong nung Nagaland Pradesh Congress, tir Bobby Panicker aser Joint Director (RD) C.I Meren naprongla tetushi tesemdanger ama aruagi dena liasü.
AKM, koba 1929 küm tenteta, iba ya Aor kaketshir tentet tulutiba lir. AKM küm 100 ajungba benjongmung sentong ya 2029 küm Waromung yimdak amungtsü, koba 2012 küm Ungma nung AKM mungdangti nung lemtetta liasü.
Bobby Panicker, shibai AKM indang mezüng tir Nokdenlemba’er jala den kibong küma lir, pa ya Waromung indang anükapang tajung ka lir.
Iba Moatsü benjongmung nung aruagi shilem agitetba atema pai telok dang pelaba lemsatepa liasü.
Küm 100 ajungba benjongmung amungtsü tesem Waromung shimba atema AKM dang pelaba metetdaktsüdang, Paniker-i AKM mezüng tir Nokdenlemba indang taküm otsütem bilemteta lemsatep. Pai ashiba agi, asür Nokdenlemba ya lenmang balala nung Tsüngrem tenzükba nisung ka liasü.
Panicker-isa “students’ centre cum guest house” ka yanglutsütsü atema sangdonga liasü aser kasa mapang iba ki yanglutsü kimong melaba atema pai Waromung village council dang temulung ajak agi pelaba metetdaktsü.
Maneni, CI Meren Joint director (RD)-ia iba benjongmung nung aruagi tentetba asoshi pelaba lemsatepa liasü.
Kasa benjongmung sentong nung kidanger yimtem – Dibuia, Yimjenkimong aser Salulumang nungi aruagi longjema benjongtepogo. Yimjenkimong aser Dibuia nungi sobaliba ken agi telok jangratemdakja liasü.
Iba dak alia, Alongsungkum Cultural Club, Waromung aser Aong Reju Cultural Organisation, Kohima ajanga saobaliba tsüngsangtem sayaa liasü.
Moatsü sentong tenzüka, Waromung Baptist Church, pastor Meren Mollier-i Tsüngremer temoatsü jazüka sarasadem. Kasa mapang Centenary Planning cum Fundraise Committee, convenor L. Imlinungba Longkumer-i 2029 AKM centenary jubilee mong indang nükla aser nükjidong tem indang lemsatepa liasü.