AKM & MCCI-i yimtsüng 3 dang pelar

Dimapur, May 28 (TYO) : Ao Kaketshir Mungdang (AKM) ketdangpurtemi Chungtia, Aliba aser Kinünger yimtsüngtemi NH 702 (Mariani Road) nung lokti nübodoka lenmang yangluba tesem tonga oa semdang.
Iba lenmang ya Nagaland kübok district asem atema lenmang tongtipangtiba lir saka BRO-i anepalu masüba atema AKM ketdangpurtemi parnok aitsü aser yim asemi khuret bena lenmang anepaluba atema tenüngsang agütsü.
Iba mapa nung tetenlar ajak dang AKM-i pelar aser maneni iba lenmang anasa aliba yimtsüngtemi Chungtia, Aliba aser Kinünger yimertemi inyakba mapa tajung ajizüka inyaktsü mepishir, ta AKM Tatong tir, Akummeren Longchar aser Tongti tezülur, Bendangkumba Aier nati külem sangdong ka nung metetdaktsü.
Ano, Mokokchung Chamber of Commerce and Industries (MCCI)-ia sangdong ka nung Aliba, Chungtia aser Kinunger yimtsüng asem dang pelaba metetdaktsü.
Mokokchung-Mariani lenmang ya Mokokchung, Tuensang aser Zunheboto district tem atema lenmang tongtipangtiba lir aser yim asemi tanü nungi IOC Junction nungi New Camp tashi kilometre 35 yanglutsü mapa tenzükba atema kanga pelar, ta MCCI Tir, Tsükti Longkumer aser Tongti tezülur, Limalenden Longkumer nati külem sangdong nung shia lir.