AKM: Survival Mokokchung

~ Ao Kaketshir Mungdang.

Kin temeja ka wazüka ayutsü aser peisasa pei temeden, sobaliba, rongsenkettsüng, tamangba aser azü kümzüka ayutsüji kija shiai inyaktsü aser iba khuret angateta tim teinyaktsü mapa jenti lir.
Ao Kaketshir Mungdang (AKM) ajanga tanü asen Aor tim temeten aser yimli asen dang nungi rakzüker aotsü asoshi ozüngi memelaba bendangertem ashikülak nükjidong ajiteta “Survival 2007” ta sür yimyim ka ayimoktsüogo. Tensa den apet tanübo “Survival 2007” yimyim agi “Survival Mokokchung” ta melenshir iba dak sentakba maparen balala inyaka arudagi.
Iba Survival Mokokchung ya tongtibangsa asen lima ozüngi memelaba bendangertem arua asen lima kechisarena nung amoksepba ngua ibaji merüktettsü nükjidong yur tenzükba lir.
Survival Mokokchung-i meinyakba:
* Muslim nunger anema meinyak
* Shishilembaba nung ambangyim mapa meinyak
Survival Mokokchung-i inyakba:
* Temeten makaba bendanger “Illegal immigrants” ajak aridok (maneni iba asüngtetba maparen inyakdagi)
* Item bendanger aridokba ajanga asen Ao kin lenmang aisü nung asüngteta kümdar.
‘Illegal immigrants’ süngra nungi asen Ao kin wazüka ayutsü asoshi AKM ajanga “Survival Mokokchung” yimyim ayimogo. Iba maparen nung Ao sensosanger ajaki shisadangtsü aser meteta alitsü onük kar yamai lemsateper.
* Parnok nütsüng onsara kümer joko talidak mali asen lima arua lipur-yimpur (indigenous people) ama küma alitsüba nükjidong lir. Iba nükjidong ataloktsü asoshi parnoki shishilembaba nung aser Aotsür/Naga tsür den kibalembuba ajanga meranger. Parnok rongnung shibai Ao-tsür mesüra Naga-tsür den kibalembudir, parnok nemji taa rongsen tulu senpettsüba kuli tejangja lir.
* Parnoki “Greater Bangladesh” omen nung ajemdaker North East India rangben nung lipur-yimpur (indigenous people) amokbanga par süngra nung ayutsü meranger. Iba nükjidong ataloktsü asoshi parnoki shishilembaba (trade & commerce) aser miim shibelenba (smuggling) ajanga inyaker.
* Par nükjidong atongtsü asoshi kiralongrar telok (fundamentalist Islamic terrorist organizations) jenti North East India aser asen Naga lima tashi anir arua inyakteper.
* Parnoki asen lima shishilembaba ajanga rongsenkettsüng nung terayanga asen Naga kin par süngra kübok ayutsü meranger (economic colonization).
* Par nütsüng yongsük mezüngdangtetba jenti arua asen lima asüngtsü meranger (Demographic invasion).
* Parnok ya masüngtet, memerük aser libaliru nung tazüokba maliba kin ka lir. Tatishitsü ka: Tamalen Mokokchung bazaar nung ngashi ayoker dak HIV/AIDS tashidak aketba putetogo. Iba ama kodanga maneptetba tashidak tamajung asen lima ayimsünga odaktsütsü munua mali.
* Yimten yimli menden nung parnoka shilem agitsü temeten bushir (Representation in Naga customary decision making bodies). Iba nükjidong ataloktsü asoshi parnoki asen liso nisung kar sübokremtsü meranger aser parnok akhüm kübok item bendangertemji alir.
* Tebilemba tamajung yur item bendangertemi asen lisopur dang tebu jaa rongsen tulu agi senpettsür. Tesülen item jagi lendong bener arutsür.
* Survival Mokokchung ya ozüngi memelaba tzümalongmartem atsüngdoktsü merangba mapatong/inyakyim ka dangbo masü, saka Ao Naga kinji Tsüngremi mulungba ama kin temeja ka ta wazüka ayutsü nükjidong yur inyaker.
* Shishilembaba (business) dak alaka asen Ao kin loktiliba, sobaliba tamendakdak, rongsenkettsüng, yimden (politic), tamangba yimsü, rongsen tzüpokdak (resources), azü (bloodline), ochi nükmen (integrity) aser tarutsü tia wazüka ayutsü nükjidong nung survival Mokokchung yimyim ayimokja tanü tashi masetshii aser metitemi inyakdar.
* Mokokchung town telungtet, temeküt town balala aser yimtsüngtem nung akok tashi item ozüngi memelaba bendanger tzümartem asüngtetba maparen akok tashi ayimjemtsü asoshi inyaka arudar. Iba dak sentakba maparen nung nisung kari pei nija tajangzük bushia item bendangertem nem jung tonglokja (akhüm agüja) aruba ajanga iba mapa tesem kar nung sadema meinyakteti lir.
* Asen lima asen nübur bendanger anemsü süngra kübok tanaben maitsüsa saksalema lidi. Joko Ao kin mangdang akaba kin ka ama alitsü merangdi. Mokokchung Survival mapatong ya tapi agi inyakba ka masü, saka Aor yimkongi tashi (mandate) agütsür tarutsü Ao kin tia dak rangloker apusoba asünung, kija aser lokti shingaia menokdangi AKM den teka amtepa, nungita yariteptsü ayongzüker.