AKM- We Care IV sentong Dec 15 aonung alitsü; Incipit band-i tongti shilem agitsü

Mokokchung, Dec 12 (TYO) : Taküm agi küm pezübuba Ao Kaketshir Mungdang-i ayongba “We Care IV” kentenmenü sentong December 15, 2016 aonung yangi Imkongmeren Sports Complex Mokokchung nung akatsü mazüngi renemdagi.
‘We Care IV’ sentong ya tongtibangsa Mokokchung Law College tajungba bener aotsü atema corpus fund ka tentettsü nükjidong nung ayongerba lir, ta tanü AKM office nung osangbener senden ka nung tayongertemi metetdaktsü.
Taküm iba sentong nung tongti shilem agir guest band-ji Dimapur nungi ‘Incipit’ band pur asütsü. Nüngtugu Samaro telok den ano Mokokchung nung tang kanga bulua tetshiba Tuneup Channel, Beyond Sunday, Infuse band-temi shilem agitsü. Iba den Lenjeter, Kr. Imnasenla, Kr. Ayusangla, Kr. Yangerjungla parnokia shilem agitsü renemdagi, ta parnoki metetdaktsü.
AKM ketdangsürtemi Mokokchung Law College tenzükba otsü kar lemsatepdang, Longkhum yimdak AKM golden jubilee amungdang Mokokchung nung law college ka lapoktsü asoshi bangzüng ka renema ayu. Aji oda, AKM-i achayanga 1981 küm Mokokchung nung law college-ji tenzük aser college tenzüka aotsü atema Aor yim shia kilen saru senpak kaka sarua liasü, ta parnokisa ashi.
Mokokchung Law College tenzüker küm 35 jungogo aser tanü iba college nungi LLB graduate asürtem 200 jungnüa kümogo. Tang iba college nung LLB tezüngdak parnok noklang ka shi lir. Mokokchung Deputy Commissioner shiba arudir pa/laji iba college reprangba board nung Chairman aser principal shiba südir pa/laji Secretary asür.
Taoba We Care asembuba tashi ayongdanga nüburtemi tangatetba tajung nung yaritepa aruogo, aji oda, Mokokchung Law College yaa Aor arok senmang ka asünung, ibai tajungtiba bener aotsü nükjidong nung lir.
Anungji, nüburtem ajak arua iba kenten nungji shilem agidaktsünür, ta tayongertemisa ayongzük.
We Care mezüngbubaji Tuli aser Mokokchung nung tzümetsüng aser anentsüh lendong ataloker kibongtem nem teyari agütsütsü nüngtem ayongzük. We Care tanabubaji Class 10 nung tamakok ngur alir kaketshirtem nem angati coaching agütsüba maparen tajungba bener aotsü asoshi ayongzük. Tasembubaji AKM-i adokba osang kaket Ao Milen tajungba menünga adoktsü asoshi liasü. Tang tashi nung We Care ajanga mapatong inyakba kata tamakok ngua mali, ta AKM ketdangsürtemisa metetdaktsü.
We Care IV sentong ya “Resurgence” omen nung ajemdaker ayonger. Iba aonung Parliamentary Secretary for Land Resources, Excise & Natural Calamities, Wb. B.S Nyanlang tongti tesemdanger asütsü asoshi jaoka lir. Iba sentong ya aonung 6:00 ako nungi tenzüktsü aser ticket jenjangji senpak 100 dang lir.