AKMWP-i Kohima Ward Panchayat tem atema inyaktsü

Kohima, September 18 (TYO) : Tawa tasen tentetba Association of Kohima Municipal Wards Panchayat (AKMWP)-i Kohima Municipality kübok kiyong 19 nung aliba panchayats 42 atema inyaktsü ta metetdaktsü.
Brihostibar nikongtsütsü Hotel 2K nung osangbener den sensaksemdang AKMWP tir, Neibulie Kiewhuo-i ashiba agi, AKMWP ji non-profit, non-political aser non-governmental telok ka lir aser iba telok nung züngsema aliba kongsangtem aser lokti ajungtsü atema inyaktsü.
AKMWP-i Kohima Municipal Council Ward telongtet nung dang mapa inyaktsü, ta Neibulie-isa metetdaktsü.
Association nung züngsemba telok ajak tangatettep nung aser amalitep lia inyaksangshitsü atema inyaktsü aser Kohima nung alirtem yariba den jila renlokba mapa nung shilem agitsü, ta paisa ashi.
Association-i tang tenteta aliba wards panchayat tem indang inyakyim nung teka maitsü saka ken o kar adokra item nung yariteptsü, ta AKMWP tir-isa metetdaktsü.
Kohima Municipal Council (KMC)-i Kohima nung aliba Panchayat nem sanitation vehicle agütsüba dak alaka senotsü melemzüktsür. Kilen shia nungi sen 50 sanitation fee sarubaji gari anepaluba aser gari anir itasen agütsüba nung endoker. Ajisüaka, KMC-i sen 50 saruba nungi shilem 10 meshir aser iba asoshi KMC dang mepelar, ta AKMWP mendenpurtemisa ashi.
Sobaliba ozüng dak alaka Panchayat nem tashi kecha magütsür aser ibaji atema AKMWP-i state sorkar dang Panchayati Raj inyakyim tenzüktsü atema asüngdangtsü, ta mendenpurtemisa shisem.
Kohima jila nung Smart City project inyaktsüji tamakoktsü kechiyong ali kibur inyakyim ajanga tetsükdaktsü ajurutsü. Ano sorkar ketdangser aikati iba inyakyim junga memetet, ta AKMWP tiri ashi.
Smart City atema centre-state senotsü lemsaba mapaji tamakoktsü kechiyong state-i shilem 10 agüja mapa meinyakteter aser CSS programmes aika sota lir. Ajisüaka, Northeast state temi senotsü noklang nung noklang shilem agüjang ta mepishibaji Centre-i agizüktsü imlar, ta AKMWP tir Kiewhuo-isa ashi.