Akokla 1 buba AIBA 1 Star Coach akümer

Dimapur, May 26 (TYO): Tetsür Boxing Coach, Akokla Tzudi Nagaland nungi mezüngbuba International Boxing Association (AIBA) 1 Star Boxing Coach akümba osang ka T. Meren Paul, General Secretary, Nagaland Amateur Boxing Association & Nagaland Olympic Association-i tanü sangdong ka ajanga metetdaktsüogo.

AIBA-i ayonger Kazakhstan kübok Astana nung tan May ita 12-18 nü tashi agiba 1 Star Coach Course nung India nungi takok ngua shilem agir 12 rong nung Akokla-a densema liasü.

NIS nungi Boxing Coach asütsü temeten ngua alila, Akokla ya Nagaland Police Sports Company nung Havildar ka lir.

Nagaland nung tsüngteptsü terenemshitsü agütsütsü aser toktepa nung shilem agitsü jenjang tajungba kümdaktsütsü mangdang yur külen Akokla-i tan 1 Star Coach akümtsü asoshi agiba terenemshitsü den sentakba senotsü ajunga Police Departement-i agütsüba osang jangjaogo.

“Police Department-i tan inyakba nungi ajizüka, senotsü peria alir saisapongtsü tentettem talisa, Sports Department-i tongti coach-tem jenjang tajungba kümdaktsütsü asoshi nungdakba terenemshitsü sentongtem nung shilem agidaktsütsü ajungshir aser ibaji  ajanga Nagaland nung saisapong jenjang ajunga temaba jenjang nung ajungkettsütsü aser national o international jenjang nung shilem agitsüsa asayar tajung anitettettsü,” ta Paul-i sangdong ajangasa metetdaktsüogo.