AKRSU-i mokdangba ajanga train aika kongshi

 

Bongaigaon, September 14 (Agencies): Tanü All Koch Rajbongshi Students Union (AKRSU) züngsemtemi train lenmang mokdangba ajanga Assam nung train aika junga mesenzüteti liasü.

Northeast Frontier (N-F) Railway otongdar kati, AKRSU aser parnok dak sentakba tentettemi mokdangba ajanga Delhi-i aoba Rajdhani Express train, Howrah-i aoba Kamrup Express, Bangalore Express train aser Guwahati-New Bongaigaon Dn Bohagi Express train tem mapang shitak nung mesenzüteti liasü, ta ashi.

AKRSU den Chilaray Sena aser Koch Rajbongshi Mohila Samiti tentettem nungi züngsemtem tanep 7.30 ako nungi 10.30 ako tashi train lenmang nung mener ozülu balala amer yimyim ayima liasü, ta police ketdangsertemi ashi.

Police-i lungkak aitertemji  apu aser tesülen chioka liasü.

Train apusotsü atema lenmangtemji anepdang 10.30 ako meta lapoktsü, ta N-F Railway otongdarisa ashi.

“Onoki Kamatapur atema state jenjang akhanger aser Rajbongshi kin atema Scheduled Tribe jenjang akhanger,” ta AKRSU Tir, Biswajit Ray-i ashi.

Parnoki state jenjang akhangba, Kamtapur nung ya West Bengal district kar aser iba den anasatepa aliba Assam district kar densema lir.