Akshay-i pa sapur ka dak atsüngba atema taitok meshi

Mumbai, April 30, 2016 : Bollywood actor Akshay Kumar-i pa sapur ka dak par bodyguard kati atsüngba atema taitok meshiogo aser pai iba tatalokba ya tia makai atalokba lir, ta ashi.
Mumbai tayimtsü anenba tesem nung Akshay sapur kati pa den selfie ka tangoktsü merangba ajanga par bodyguard kati tsüngoktsü. Iba tatalokba indang video-a ka online nung prokshiogo aser ibaji ajanga social media nung nüburtem kanga makmakshimakdaktsüogo.
Ni iba tatalokba nung kü bodyguard merenshiogo aser tarutsü nung iba ama lendong nungi pila alitsü merangtsü, ta Akshay-i ashi.
Bollywood nung ‘Khiladi’ Kumar ta tenüng jaloktsür alisangi twitter aser Facebook naprong nung taitok meshia züluogo.
“Tanü atalokba ya meimlaba mapa ka aser tia maka lir. Ni tayimtsü anenba tesem nung alidang tera rarateper ama ka angashi. Ni jaja yonga aodang nibo kechi atalokar kecha mangu. Aser khenbika lir külenang kü bodyguard kati ni sapur ka dak tsüngoktsüba kü dang ashi. Ni iba tatalokba atema kü bogyguard merenshiogo aser tarutsü nung iba ama yimya mamshitsü kanga züngoka shiogo. Ni pai atsüngsang dang kü mulung ajak agi taitok meshir. Ni sapurtem ajak ni kanga akhümtsübur aser iba ama atalokba ajanga teti mangatettep adoker. Tarutsü nung ibala mesükba tatalokba nungi jenbua alitsüsa kanga kümdanga alitsü,” ta pai social media ajanga ashi.
Tang Akshay ya Rajinikanth den külemi ‘Robot 2’ film tangokba nung kanga mazüngi lir aser ano memunui ‘Houseful 3’ aser ‘Rustom’ film tem nunga angutsü.