Akshay Kumar, Ajay Devgn, Karan Johar nungeri PM den ajurutep

Luchii/December 19, 2018 (Agencies): Akshay Kumar, Ajay Devgn aser Karan Johar nunger densem Bollywood producer aser actor tem parnok kari Sangtennü Ato Kilonser Narendra Modi den ajurutepogo, shiba Maharashtra semdanga liasü. PM den ajurutepba mapang parnoki Indian film industry-i ajuruba tetsükdaktsütem pa den lemsatepa liasü.
Parnok rongnung ano film producer Ritesh Sidhwani, Siddharth Roy Kapur, Rakesh Roshan, Ronnie Screwvala, Vijay Singh – CEO – Fox Star Studios aser Central Board of Film Certification (CBFC) mendenbuba Prasoon Joshi, nunger densema liasü.
Film Industry nungi teshimtetba purtemi media aser entertainment industry kanga kara renloka aoba aser iba tsütsü lenmang sadema lapoka aliba indang PM den lemsatepa liasü. parnokisa tanga shishlembaba den liromedema entertainment industry nung GST benoktsü shidangogo, ta PIB sangdong ka ajanga metetdaktsü.
Ato Kilonser-i ashiba agi, Indian entertainment industry ya alima ajunga nung kanga nüngtugu kümogo aser iba ajanga India soft power status renloka aoba nung shilem tulu ka agir.
Paisa Union Government-i entertainment industry nongita yaritsü tenangzükba agütsü aser parnoki benokdangba onüktem asadangtsü, ta ashi.
Iba senden sülen Ato Kilonser-i Twitter nung yamai zülutsü; “Film aser entertainment industry nungi teshimtetba purtem den kanga takok ngua sensaksemogo. Parnoki film aser entertainment industry-i bushisüngdangba indang lemsatep aser iba sector atema GST dak sendakba nung shisatsü kar agütsüogo.”
Kasa mapang nung teshimtetba purtem rongnungi Kumar-i ashiba agi, “Ato Kilonser Narendra Modi-i onok tejangrabatem angatsü asoshi mapang agütsüba atema kanga pelar aser industry dak sendakba nung ken o tem asatepbatem ya asadangtsü tenangzükba agütsüogo.”
Film yanglur aser Ato Kilonser na tang agi tanabenbuba ajurutepogo. Taküm Mongputeni/Oct 24 nüa parnok ajurutepa liasü. Parnok den külemi actor Aamir Khan aser Sidhwani nunger densema PM den Delhi nung ajurutepa liasü.