Akshay Kumar-i asür kibongtem yaritsü asoshi mepeshi

New Delhi, April 19 (Agencies): National Award agizüksang actor Akshay Kumar-i lokdi ajungtsü atema mapa tajung aika inyaka arudar. Tawa pai App ka amenlokogo aser iba ajanga nüburtemi duty mapang pei taküm bendanga agütsüba mitkar kibongtem atema sen tenla agütsütettsü.
Akshay-i video ka dena Twitter nung yamai tweed sütsü, “Asenok taküm lidaktsütsü mechi nung parnok taküm bendanga agütsür.. Anungji parnok kibongtem anepalutsübajibosa asenoki inyaktettsü. http://bharatkeveer.gov.in nung lemsateptsü asoshi mepishir.”
CRPF anogo (April 9, 2017), nung Home Minister, Rajnath Singh-i Vigyan Bhawan nung ‘Bharat Ke Veer’ amenlokja liasü aser iba sentong nung Akshay Kumar densema liasü. Nisung mashi kati CAPF tem asür mitkartem kibong atema sen lakh 15 tashi tenla agütsütettsü.
Akshay Kumar-i tawa ang Sukma nung Naxal telungpurtemi CRPF mitkar khasetba kibong 11 nem sen crore 1.09 tenla agüja liasü. “Ni tanü nenok den actor ka ama masü saka Army officer chir ka ama nokdaker,” ta Akshay-i ashi.