Akshay Kumar-i shilem agiba ‘Rustom’ film indang poster sayaogo

Mumbai, March 3, 2016 : Bollywood action star Akshay Kumar-i pai shilem agiba ‘Rustom’ film indang poster mezüngbuba Brihostibarnü sayaogo. Pai iba film nung navy ketdangser ka ama shilem agir.

Iba poster nung pa navy indang sobutsü sobur bangsemoa tila ka yur adoka lir. Kasa poster nung film nung pa den külemi shilem agila, Ileana D’Cruz-a pa sülen noksaa tila ka nung adoka lir.

Film tenüng züluba tobur junga ngudaktsütsü asoshi ojangtem rongnung ka nung injang agi akahba tarak amai noksa asem lir.

“Injang asem akahba ajanga linük anokshitsü aser pa taküm melenshi! Rustom dak kechi atalok ibaji August 12, 2016 nü metettsü,” ta Akshay-i website ajanga lemsatepogo.

Iba film ya August 12, 2016 nü sayatsü sentong lir.

Akshay-i tesüiba film tem nunga sepai shilem aiben agia aruogo. Pai “Holiday: A Soldier is Never Off Duty” film nunga army ketdangser ka ama shilem agi liasü. Iba den külemi “Airlift” aser “Gabbar Is Back” film tem nunga pai linük asoshi bendanga agütsür shilemsa agiogo.