Akshaye Khanna-i The Accidental Prime Minister film nung shilem agitsü

Metsüremi 14, 2018 (Agencies): Film yanglur Hansal Mehta indang ‘The Accidental Prime Minister’ film ya Metsüremi 31 nungi yanglu tenzüktsü asoshi renemdar. Mehta-i züluba ‘biographical political’ film nung nüngtugu actor Anupam Kher aser Akshaye Khanna nati tongti shilem agitsü.
“Akshaye-i iba film nung shilem agitsü aliba atema jangratema bilemer. ‘The Accidental Prime Minister’ film ya Anupam Kher aser Akshaye Khanna nati anir Metsüremi 31 nungi tenzüka tangoktsü. Iba film ya Vijay Ratnakar Gutte-i direct asütsü, Bohra Brothers-i produce asütsü aser Mayank-i yanglushitsü,” ta, Sangtennü (Tuesday) tweeter ajanga Mehta-i metetdaktsü.
‘The Accidental Prime Minister’ film nung taoba India Ato Kilonser Manmohan Singh shilem Anupam-i agitsü. ‘Economist aser politician’ Manmohan-i 2004 nungi 2014 tashi ‘United Progressive Alliance’ sorkar kübok Ato Kilonser ka ama inyakogo. Iba film ya 2014 nung Sanjaya Baru-i züluba ‘The Accidental Prime Minister’ otsü nung ajemdaker yanglutsü aser Akshaye-i Baru shilem agitsü.