AKTD-i Quarter Marathon asemteptsü ayongzüker

Dimapur, Aenjeti 26 (TYO): Ao Kaketshir Telongjem Dimapur (AKTD) taküm Hon Jubilee amungtsü aliba nüngtem nung küm tepiyong sentong balala agiyonga aotsü asoshi sentong lir, aser iba dak sendakba nung Aenjeti 29 nü Quarter Marathon ka ayongzüka aliba nung tejangrartemi arua shilem agitsü asoshi kaketshir lokti ajanga pelashishia jaoker, ta AKTD ketdangsertem sangdong ka ajanga metetdaktsü. Iba asemtepba nung tetsür aser tebur takoker nem senpet sen 20,000, tanabuba jenjang nung takok angurnem sen 10,000, tasembuba atema sen 5,000 agütsütsü. Iba den bendenloksema tetsür aser tebur asemteper pongungu nem consolation prize senpet sen meyirejang kaka agütsütsü. Maneni asemtepertem rongnungi tambusang/tantsüla aser tanobusang/tanutsüla nem Gift hampers agütsütsü.
Marathon atema registration angati asütsü aser asemteptsüba anogo anepdang 5:00 ako nungi 5:40 tashi nung State Stadium nung tejangrartemi pei tenüng züngoksemtettsü, anungji tejangrartem ajak dang mapang shidak nung arua pei tenüng züngoksemtsü asoshi mepishir, aser iba sülenang chest numbers agütsütsü. Mapang atakteter aliba aser temzüng ozüng lateter aliba shidak amshitsü, ta kasa sangdong ajangasa metetdaktsü.
Government of Nagaland, Rural Development, Director Imlimeren Jamir aser Dimapur Chamber of Commerce & Industries tir, Akashe Zhimomi nati iba sentong nung Chief Patron aser Patron asütsü. Maneni Dimapur Deputy Commissioner, Sushil Kumar Patel-i tetenzükba sentong nung asemtepba nung shilem agirtem den tajungshi o jembitsü.
Maneni AKTD-i taoba mapang nung ketdangpurtem, secretary tem aser züngsemtem iba sentong nung arua shilem agitsü asoshi alakteta jaoker, ta AKTD ajangasa shisem.